Президент Шавкат Мирзиёев 3-март күни Хорезм ўәлаятында әмелге асырылып атырған реформалардың нәтийжелилиги ҳәм келешектеги тийкарғы ўазыйпалар бойынша мәжилис өткерди.

Атап өтилгениндей, соңғы жыллары ўәлаятта бар имканиятлардан ақылға уғрас пайдаланыў арқалы көплеген тараўларда унамлы нәтийжелерге ерисилди. Санаат көлеми 2016-жылдағы 2,8 триллион сумнан 34,3 триллион сумға жетти, жалпы аймақлық өним 63 триллион сумды қурады. Өткен жылы ўәлаятқа 1 миллиард доллардан аслам инвестиция тартылды.

Соның менен бирге, ерисилген көрсеткишлер аймақтың потенциалына толық сәйкес емес екенлиги атап өтилди. Әсиресе, туризм тараўында сийрек ушырасатуғын тарийхый ҳәм мәдений мийрасқа ийе болған аймақта туристлердиң орташа қалыў мүддети 1-2 күн менен шекленбекте.

Ўәлаятта 1 миллионнан аслам жаслар жасайды, ҳәр жылы 35 мың жас мийнет базарына кирип келеди. Олардың тәлим-тәрбиясы, заманагөй кәсип-өнер ийелеўи ҳәм бәнтлигин тәмийинлеў аймақ басшысының турақлы итибарында болыўы зәрүр екенлиги көрсетип өтилди. Жас әўладты Жалалиддин Мангуберди, Беруний, Хорезмий ҳәм Замахшарий сыяқлы уллы тулғаларға мүнәсип етип тәрбиялаў бойынша жаңа системалы қатнасларды ислеп шығыў ўазыйпасы қойылды.

Халықтың 67 проценти аўылларда жасайтуғынын есапқа алып, әйне аўыллық жерлерде қосымша дәрамат дереклерин жаратыў арқалы жумыссызлық ҳәм кәмбағаллықты қысқартыў әҳмийетли екени атап өтилди.

Мәселен, Гүрлен, Топыраққала, Янгибазар ҳәм Қўшкўпир районларында шарўашылыққа қәнигелескен 135 мәҳәлледе нәсилли шарўаны көбейтиў, Үргенш, Ханқа, Қўшкўпир ҳәм Шават районларында мәҳәллелерди қурылыс материаллары, тоқымашылық, өнерментшилик ҳәм мебель қурылысы бағдарларына қәнигелестириў, сондай-ақ, Үргенш, Қўшкўпир, Ханқа, Янгиариқ ҳәм Шават районларында 6 санаат ҳәм хызметлер микроорайын шөлкемлестириў арқалы кеминде 10 мың халықты кәмбағаллықтан шығарыў имканияты бар.

Өткен жылы ўәлаятқа келген сырт елли ҳәм жергиликли туристлердиң саны 12,5 миллионға жеткен. Бирақ хызметлердиң көлеми ҳәм сапасы, жаңа туристлик маршрутларды ашыў, саяхат объектлерин мазмуны жағынан байытыў жумыслары жетерли емеслиги атап өтилди.

Хийўа қаласы, Бағат ҳәм Хийўа районларындағы туризм мәҳәллелеринде сервис объектлерин қурыў, 59 мәҳәлледеги 14 ғалабалы көше бойынша мастер-реже ислеп шығып, исбилерменлерге усыныў ўазыйпасы қойылды.

10,8 гектар майданда жайласқан Сулайман қала комплексин жаңа туристлик объект сыпатында комплексли раўажландырыў бағдарламасын ислеп шығыў тапсырылды. Сондай-ақ, Үргенш қаласы арқалы өтетуғын Шават каналы бойында туризм ҳәм сервис объектлери және кеўилашар орайлар шөлкемлестириў бойынша мастер-реже ислеп шығылады.

Мәжилисте инвестиция ҳәм экспортты арттырыў тийкарғы ўазыйпа сыпатында атап өтилди. Хазорасп, Үргенш, Шават, Топыраққала ҳәм Үргенш қаласының потенциалынан нәтийжели пайдаланып, ири санаат жойбарларын әмелге асырыў зәрүр екенлиги атап өтилди.

Питнак қаласындағы автомобиль заводының қуўатлылығын арттырыў, локализациялаў дәрежесин 62 процентке жеткериў арқалы тутас машина қурылысы кластерин қәлиплестириў имканияты бар екенлиги атап өтилди. Сондай-ақ, Хазораспта химия, тоқымашылық ҳәм азық-аўқат, Шаватта мебель қурылысы ҳәм текстиль бағдарларында жаңа жойбарлардың әмелге асырылатуғыны белгиленди.

Ўәлаяттың қала ҳәм районларын заманагөй көриниске келтириў, жол ҳәм суў инфраструктурасын жақсылаўға 1 миллиард 600 миллион доллар ажыратылатуғыны мәлим етилди.

Улыўма, усы жылы сырт ел инвестициясының көлемин 2 миллиард доллардан, экспортты 510 миллион доллардан арттырыў ўазыйпасы қойылды. Бул арқалы жалпы аймақлық өнимди 8,4 процентке, санаатты 9 процентке, хызметлерди 16,2 процентке, аўыл хожалығын 5,7 процентке арттырыў нәзерде тутылған.

Өткен жылы Хорезм ўәлаятында кәмбағаллық дәрежеси 11,9 проценттен 6,7 процентке түскени республикадағы ең жоқары нәтийже болды. Бирақ кәмбағаллық дәрежеси республикадағы орташа дәрежеден жоқары болып қалып атырғаны атап өтилди. Сонлықтан, жылдың ақырына шекем жумыссызлық ҳәм кәмбағаллық дәрежесин кеминде 3 процентке шекем қысқартыў тийкарғы ўазыйпа сыпатында белгиленди.

Соннан Хазорасп, Ханқа, Шават, Янгиариқ, Янгибазар, Топыраққала, Хийўа ҳәм Үргенш қалаларын жумыссызлық ҳәм кәмбағаллықтан жырақ аймаққа айландырыў тапсырылды.

Мәжилис жуўмағында жуўапкерлерге бир қатар анық ўазыйпалар жүкленди.

Атап айтқанда, Гүрлен районындағы 158 километр каналды реконструкциялаў, исбилерменлик жойбарлары ушын 81 миллион доллар ажыратыў, 270 насос агрегатын энергияны үнемлейтуғын үскенелерге алмастырыў, Өзбекстан – Түркменстан шегараалды саўда зонасының жумысын қаржыландырыў, социаллық объектлер ҳәм инфраструктураны оңлаўға 100 миллиард сум қаратыў бойынша тапсырмалар берилди.

Президентимиз жуўапкер адамлардың алдына жумысларды халықтың турмысына анық өзгерис алып келетуғын, нәтийжелиликке қаратылған етип шөлкемлестириў, ҳәр бир район ҳәм мәҳәлледе мәнзилли қатнасты тәмийинлеў ўазыйпасын қойды.

ӨзА