Орайлық ысытыў системасынан үзликсиз пайдаланыў инсан терисине унамсыз тәсир етиўи мүмкин. “The Guardian” дерматолог-консультант Эмма Крайторнның бул ҳаққындағы пикирлерин жәриялады.

Қәнигениң атап өтиўинше, инсан териси суўды услап турыў ушын қорғаныў қатламына ийе, бирақ бул қатлам пүткиллей суў өткермейтуғын емес. Суў тери бети арқалы үзликсиз ҳәрекетленеди ҳәм бул процесс ҳаўа ығаллығына байланыслы. Тери ушын ең қолайлы шараят шама менен 40 процент салыстырмалы ығаллық есапланады. Ҳаўа буннан қурғақ болса, суў тери арқалы тезирек шығып кетеди, бул болса қорғаныў қатламын жеңил ғана асқынлатыўы мүмкин.

Суўдың пуўланыўы нәтийжесинде тери қурғақласқандай сезиледи, қан тамырлары бираз кеңейеди ҳәм тери қызарыўы мүмкин. Исиниўди қозғатыўшы цитокинлер деп аталыўшы белоклар активлесип, нерв талшықларын қозғайды, соның ушын адам, итимал, қышыўды сезеди. Орайлық ысытыў системасы бөлме ҳаўасын ыссы, бирақ қурғақ етеди, ҳаўа алмасыўы болмаса, бул процесс және де күшейеди. Усы мәнисте ысытыў териге тәсир көрсетиўи мүмкин, бирақ ол қыстағы машқаланың бирден-бир себеби емес.

Қыс мәўсиминде сырттағы суўық ҳәм самаллы ҳаўа да терини қурғатады, себеби суўық ҳаўа ығаллықты кемирек сақлайды, самал болса суў ҳәм тәбийғый майларды тезирек пуўландырады. Соның ушын ыссы бөлме де, суўық сыртқы орталық та териге тәсир көрсетиўи мүмкин. Айырым адамлар, әсиресе, экзема ямаса розацеа сыяқлы тери кеселликлерине бейим адамлар бундай өзгерислерге көбирек сезгир болады.

Қәнигелер тери қурғап атырған болса, орайлық ысытыўды бираз пәсейтиў ҳәм бөлмеге ығаллағыш қойыўды усыныс етеди. Терини мүләйим күтиў әҳмийетли: қопал сабынлардан қашыў, хош ийисли затлары аз болған кремлерден пайдаланыў керек. Ығаллықты сақлаўшы кремлер және териниң қорғаныў қатламын қоллап-қуўатлаўшы церамид ҳәм глицерин сыяқлы затлар суўдың шығып кетиўин пәсейтеди.

Қарақалпақстан хабар агентлиги