Энергетика тараўында жас кадрларды қоллап-қуўатлаў ҳәм олардың потенциалын раўажландырыў мәмлекетимиз сиясатындағы тийкарғы бағдарлардан бири болып есапланады. Бул тараўдағы кадрларды таярлаў, оларды маманлық ҳәм тәжирийбе менен тәмийинлеў, инновациялық идеяларын әмелге асырыў имканиятын бериў мәмлекеттиң турақлы Энергетикалық раўажланыўы ҳәм стратегиялық раўажланыўы ушын үлкен әҳмийетке ийе.

Бүгин Д.И.Менделеев атындағы Россия химия-технология университетиниң Ташкент филиалында Энергетика министри Жўрабек Мирзамаҳмудов жаслар менен гезектеги ашықтан-ашық сөйлесиўинде усы мәселелердиң шешимине итибар қаратты.

Тараў қәнигелери, студентлер қатнасқан бул ушырасыўда Энергетика министри Жўрабек Мирзамаҳмудов барлық жасларды мүбәрек Рамазан айы менен қызғын қутлықлап, кейинги жыллары мәмлекетимизде мәмлекетимиз басшысының басшылығында жасларды қоллап-қуўатлаў, олардың потенциалын жүзеге шығарыў, мүнәсип мийнет ҳәм билимлендириў шараятларын жаратыў бағдарында избе-из реформалар әмелге асырылып атырғанын айрықша атап өтти.

Атап өтилгениндей, жанылғы-энергетика тармағының раўажланыўы мәмлекет экономикасы ушын әҳмийетли болып есапланады. Сол себепли, тараўда әмелге асырылып атырған жойбарлар, “жасыл” энергетиканы раўажландырыў бойынша ерисилип атырған нәтийжелер ҳәм бул бағдардағы режелер үлкен әҳмийетке ийе. Әйне усындай процессте жаслардың билим ҳәм потенциалы ҳәм олардың белсене қатнасыўын тәмийинлеў тийкарғы ўазыйпалардан болып есапланады.

Бүгинги күнде тараўда 105 мыңнан аслам жумысшы-хызметкер мийнет етпекте. Соннан 15 мың 85 ин 30 жасқа шекемги хызметкерлер қурайды. Олардың 237 си (соның ишинде, 7 ҳаял-қыз) басшылық лаўазымларында, 3 мың 316 сы қәниге сыпатында, 11 мың 532 си болса өндирис кәрханаларында жумыс алып бармақта.

Тараўда кадрлар резервин беккемлеўге айрықша итибар қаратылмақта. 2025-жылы 1 мың 358 жоқары билимлендириў мәкемесиниң питкериўшиси жумысқа қабыл етилген болса, 1 мың 18 жигит-қыз колледж ҳәм техникумларды тамамлап, тармақ кәрханаларында мийнет жолын баслады. Бул болса жаслардың энергетика тараўына қызығыўшылығы артып баратырғанын көрсетеди. Жас қәнигелердиң тәжирийбесин арттырыў мақсетинде олар сырт еллерге хызмет сапарлары ҳәм қәнигелигин арттырыў курсларына жиберилмекте. Соның ишинде, 2025-жылдың өзинде 311 хызметкер сырт елде таярлаў ҳәм қайта таярлаў курсларында қатнасты.

– Бүгин энергетика тармағы алдында турған ўазыйпалардың көлеми кең ҳәм және де жуўапкершиликли. Бул ўазыйпаларды табыслы орынлаў, бәринен бурын, билимли, интакер ҳәм заманагөй пикирлейтуғын жас кадрларға байланыслы. Сонлықтан, министрлик системасында жасларды ҳәр тәреплеме қоллап-қуўатлаў, олардың кәсиплик өсиўи ушын шараят жаратыў ҳәм инновациялық идеяларын жүзеге шығарыў тийкарғы ўазыйпамыз болып қалады. Энергетика тараўында жаслардың үлеси артып атырғаны, жаңа питкериўшилерди жумысқа қабыл етиў, сырт ел тәжирийбесин үйрениў ҳәм маманлығын арттырыў жумыслары системалы жолға қойылғанын айрықша атап өтиў зәрүр. Соның менен бирге, келешекте ири энергетика жойбарларын әмелге асырыўда жас қәнигелердиң қатнасы және де кеңейеди ҳәм олардың илимий-әмелий басламалары қоллап-қуўатланады, – деди сөйлесиў ўақтында министр.

Сондай-ақ, сөйлесиўде сырт елли инвесторлар менен биргеликте ири қуўатлылықтағы ыссылық, қуяш ҳәм самал электр станцияларын қурыў бойынша әмелге асырылып атырған перспективалы жойбарлар ҳаққында да сөз болды. Алдында турған ўазыйпалар кең көлемли екени, жаслардың басламасы ҳәм инновациялық идеяларын қоллап-қуўатлаў айрықша әҳмийетке ийе екени айрықша атап өтилди.

Ашық ҳәм қызғын руўхта өткен бул сөйлесиў жаслардың пикир ҳәм усынысларын тыңлаў, тараўдағы машқалаларға биргеликте шешим излеў және жаңа идеяларды алға қойыў имканиятын бергени менен әҳмийетли болып есапланады.

Насиба Зиёдуллаева, Ойбек Пардаев (суўрет), ӨзА