Пуқаралардың мүрәжатлары менен ислесиў системасының нәтийжелилигин арттырыў, халық пенен ашық ҳәм нәтийжели пикирлесиўди жолға қойыў мақсетинде Ишки ислер министрлиги жанындағы Тергеў департаменти тәрепинен жеке ҳәм көшпели қабыллаўлар турақлы түрде шөлкемлестирилмекте.

Ишки ислер министриниң орынбасары, Тергеў департаментиниң баслығы Рамазон Ашропов өткерген жеке қабыллаўда халықтың бар машқалаларын анықлаў ҳәм оларды сапластырыў мақсет етилген.

Қабыллаў даўамында 148 пуқараның 129 дан аслам мүрәжаты үйренилди. Мүрәжатлардың 98 и тергеў ҳәм сорастырыў жумысы, 20 сы тергеўге шекем тексериў, 5 еўи хызметкерлердиң ис-ҳәрекетлери бойынша ҳәм 6 сы ишки ислер уйымларына байланыслы басқа да мәселелерди қурайды.

Халыққа қолайлық жаратыў мақсетинде Қарақалпақстан Республикасы ҳәм ўәлаятлардың халқы ушын жеке қабыллаў онлайн тәризде де шөлкемлестирилип, алыс аймақларда жасайтуғын пуқаралардың машқалалары видеоконференцбайланыс арқалы тыңланды.

Жеке қабыллаў даўамында министрдиң орынбасары және жуўапкер басшы ҳәм хызметкерлер тәрепинен пуқаралар менен оларды қыйнап атырған машқалалар бойынша тиккелей сөйлесиў өткерилди.

Атап айтқанда, тергеўге шекем тексериў, сорастырыў ҳәм дәслепки тергеў процесслери, миграция ҳәм пуқаралықты рәсмийлестириў, жол ҳәрекети қәўипсизлиги ҳәм басқа да бағдарлардағы мүрәжатлар қабыл етилип, оларды нызамлы ҳәм оператив шешиў бойынша жуўапкерлерге анық көрсетпелер берилди.

Келип түскен мүрәжатлардың 31 и ямаса 24 проценти усы жердиң өзинде қанаатландырылды, 15 и ямаса 11,6 проценти бойынша пуқараларға тийисли түсиниклер берилди. Қалған 83 мүрәжат ямаса 64,3 проценти қосымша үйрениўди талап еткени себепли орынлаўға қаратылып, өз ўақтында ҳәм қалыс көрип шығылыўы қадағалаўға алынды.

Халық пенен бундай ашық пикирлесиў ҳәм жеке қабыллаўлар системалы түрде даўам еттириледи.

Н.Абдураимова, ӨзА