Орайлық банк физикалық тәреплерге аралықтан финанслық хызметлер көрсетиў процесинде мәлимлеме қәўипсизлиги, киберқәўипсизлик жағдайларының алдын алыў бойынша минимал талапларды белгилейтуғын “Кредит ҳәм төлем шөлкемлери тәрепинен аралықтан финанслық хызметлерде мәлимлеме қәўипсизлиги ҳәм киберқәўипсизликти тәмийинлеў және алдаў жағдайларының алдын алыў ҳаққындағы реже” жойбарын жәмийетшилик додалаўы ушын жәриялады.

Режеде төмендеги тийкарғы талаплар белгиленбекте. Пайдаланыўшыны идентификациялаў ҳәм аутентификациялаў тәртиплери, қурылмалар ҳәм пайдаланыўшы сессияларын қәўипсиз басқарыў, онлайн кредит (микроқарыз) ажыратыўда алдаўшылықтың алдын алыў бойынша механизмлер, алдаўшылық жағдайы нәтийжесинде жеткерилген материаллық зыянды қаплаў тәртиби белгиленбекте.

Сондай-ақ, нызамға қайшы операцияларды анықлаў ҳәм алдын алыў бойынша талаплар, мағлыўматларды сақлаў ҳәм қорғаў қағыйдалары, мобиль қосымшалар ҳәм веб-талқылаўлардың қәўипсизлигин тәмийинлеў талаплары, пайдаланыўшыларды киберқәўипсизлик бойынша хабардар етиў ҳәм оқытыў тәртиплери белгиленбекте.

Егер алдаўшылық белгили бир мобиль қосымша, веб-интерфейс ямаса басқа да мәлимлеме системасында жүз берген болса, материаллық зыянды қаплаў миннетлемеси, кредит шөлкеми, төлем шөлкеми, олардың агенти ямаса субагенти, төлем системасы операторы ямаса мәлимлеме системасынан пайдаланыў ҳуқықын алған басқа субъекттиң мойнына жүкленеди.

Егер алдаў операциясы мәлимлеме системасы арқалы, бирақ агент ямаса субагент қатнасыўында әмелге асырылған болса, тийкарғы жуўапкершилик – кредит ямаса төлем шөлкемине, субсидиар (қосымша) жуўапкершилик – агент ямаса субагентке жүкленеди.

Нормативлик ҳүжжет жойбары бойынша жәмийетшилик додалаўы 12-декабрь күни жуўмақланады.

Шаҳноза Маматуропова, ӨзА