Өзбекстан Республикасы делегациясының Оттава қаласына сапары ўақтында Канада парламентинде “Өзбекстан күни” болып өтти, онда “Жаңа Өзбекстан: Шавкат Мирзиёев жолы” китабының презентациясы болып өтти.

Илажда Парламент, Бас министрдиң аппараты, ҳәр қыйлы министрликлер ҳәм уйымлар, бизнес ассоциациялар, сондай-ақ, экспертлер жәмийетшилиги ҳәм ғалаба хабар қуралларының ўәкиллеринен ибарат 80 нен аслам адам қатнасты.

Канада тәрепине Өзбекстандағы реформалардың заманагөй бағдары, соның ишинде, экономиканы либералластырыў, инвестициялық орталықты жақсылаў, ҳаял-қызлар ҳәм жасларды қоллап-қуўатлаў илажлары, “жасыл” энергетика ҳәм инновациялар тараўындағы жаңа басламалар ҳаққында толық мағлыўмат берилди.

Қатнасыўшылар Өзбекстан Президенти Шавкат Мирзиёевтиң басшылығында әмелге асырылып атырған өзгерислердиң көлемин жоқары баҳалап, ашық ҳәм күтилген исбилерменлик орталығының қәлиплесиўи мәмлекетти ең перспективалы шериклерден бирине айландыратуғынын атап өтти.

Өзбекстан Республикасы Президенти жанындағы Стратегиялық ҳәм регионлараралық изертлеўлер институты (СРИИ) директорының орынбасары Бахтиёр Мустафаев мәмлекеттиң Орайлық Азияны және де турақлы ҳәм беккем регионға айландырған жаңа регионаллық сиясаты ҳаққында баянат жасады.

Оның атап өтиўинше, Шавкат Мирзиёев сайланғанынан соң Өзбекстан итибарлы изоляциядан ашықлық сиясатына өтти. Бул регион мәмлекетлери арасында турақлы қарым-қатнасты жолға қойыў, шегаралар ҳәм трансшегаралық дәрялар суўынан пайдаланыўға байланыслы узақ жыллық мәселелерди шешиў, саўда, энергетика ҳәм транспорт тараўларындағы бирге ислесиўди жеделлестириў имканиятын берди.

“Булардың барлығы Орайлық Азияның халықаралық майдандағы абырайын сезилерли дәрежеде беккемледи, буны “Орайлық Азия плюс” форматы шеңбериндеги сыртқы шериклер, соның ишинде, Қытай, Россия, Европа Аўқамы ҳәм АҚШ пенен бирге ислесиўдиң кеңейиўи тастыйықлайды”, – деди спикер.

СРИИ экспертиниң сөзлерине бола, барлық шериклер менен нәтийжели ҳәм өз-ара пайдалы бирге ислесиў ушын ашық-айдынлық, өз-ара байланыслылық ҳәм турақлылықты тәмийинлеў регионның тийкарғы ўазыйпасы болып қалмақта. Онда Канада менен бирге ислесиўди раўажландырыўға айрықша итибар қаратылмақта.

Усы жерде Б.Мустафаев Өзбекстан-Канада қатнасықларын кеңейтиў перспективаларына толық тоқтап өтти. Ташкент ҳәм Оттаваның улыўма қәдириятлары – ашық-айдынлық, халықаралық ҳуқықты ҳүрмет етиў, сөйлесиў ҳәм өз-ара пайдалы шерикликке умтылыў сыяқлы тәреплер уқсас екенлиги атап өтилди. Буннан тысқары, еки мәмлекет те экономиканы диверсификациялаў ҳәм инновациялық шешимлерди енгизиўге итибар қаратпақта.

Эксперт Өзбекстан ҳәм Канада арасындағы бирге ислесиўдиң өсиў ноқатлары болыўы мүмкин болған жасыл энергетика тараўындағы жойбарларды раўажландырыў, жасалма интеллект тараўында биргеликтеги технологиялық басламаларды әмелге асырыў, билимлендириў алмасыўын кеңейтиў, сондай-ақ, туризм ҳәм мәдений бағдарламаларды буннан былай да раўажландырыў сыяқлы бир неше бағдарларды атап өтти.

ӨзА