Бизге белгили, мәмлекетимиз басшысы Вашингтонда болып өткен С5+1 саммити шеңберинде АҚШ Конгреси Ўәкиллер палатасының ағзалары менен ушырасыў өткерди. Бул сөйлесиў еки мәмлекет қатнасықларын жаңа басқышқа алып шығыўда айрықша әҳмийетке ийе. Конгресс ағзасы Билл Хайзен Президент Шавкат Мирзиёев қабыллаўынан кейин ушырасыў ҳаққындағы пикирлери менен бөлисти.

– Шавкат Мирзиёев пенен ушырасыў жүдә пайдалы болды, – деди Хайзенга. – Биз кейинги жыллардағы қатнасықларды додалаў менен бирге байланысларымыз келешекте қалай раўажланыўы мүмкин екенлигин де көрип шықтық. Қәўипсизлик, энергетика, минерал ресурслар ҳәм саўда тараўларындағы бирге ислесиў ҳаққында пикир алыстық. Дурыс, ҳәзир қатнасықлар жақсы раўажланбақта. Соның менен бирге шерикликти буннан былай да кеңейтиў имканияты да кең.

Сондай-ақ, конгрессмен жақын күнлерде Өзбекстанға сапар етиў нийети бар екенлигин де атап өтти:

– Мен еле Өзбекстанда болмағанман. Ҳәзирги ўақытта бул сапарды тезирек шөлкемлестириў ҳаққында ойлап атырман.

Сиясатшының сөзлерине бола, энергетика ҳәм минерал ресурслар тараўындағы бирге ислесиў ҳәр еки мәмлекет ушын үлкен экономикалық имканият жаратады. Соның менен бирге, қәўипсизлик бойынша қоспа бағдарламаларды кеңейтиў, жаңа шәртнамалар дүзиў де өз-ара қатнасықты беккемлейди:

– Минераллар ҳәм энергия ресурслары бойынша шериклик экономикаларымыздың раўажланыўы ушын оғада әҳмийетли. Қалаберди, қәўипсизлик тараўындағы бирге ислесиўди кеңейтиў де оғада әҳмийетли. Усы көзқарастан регионда өз-ара дослық қатнасықларын сақлап киятырғаны қуўанышлы жағдай.

Қәниге С5+1 саммити ҳәм Орайлық Азияның глобал экономикалық ҳәм стратегиялық әҳмийетине де тоқтап өтти:

– Орайлық Азия әсирлер даўамында әййемги Жипек жолы ҳәм бай тарийх пенен тығыз байланыслы ҳалда раўажланған. Аймақта саўда бағдарлары, қубырлар ҳәм кән ресурслары бойынша имканиятлар көп. АҚШ ушын региондағы мәмлекетлер, атап айтқанда, Өзбекстан сыяқлы стратегиялық шериклерге сүйениўи оғада әҳмийетли. Бул бизге экономикалық жақтан Қытайға күшли байланыслылықты азайтыў имканиятын береди.

Қулласы, аналитиклердиң пикиринше, Өзбекстан ҳәм АҚШ сөйлесиўи енди жаңа әмелий мазмунға ийе болмақта. Атап айтқанда, минерал ресурслар, энергия қәўипсизлиги ҳәм саўда тараўындағы бирге ислесиў еки мәмлекет арасындағы стратегиялық шерикликти және де беккемлейди.

Дилшод ҲАКИМОВ,

ӨзАның хабаршысы