Самарқанд қаласында Өзбекстан ҳәм Япония жоқары билимлендириў мәкемелери ректорларының бесинши форумы өз жумысын баслады.

Өзбекстан Республикасы Жоқары билимлендириў, илим ҳәм инновациялар министрлиги ҳәм Японияның Билимлендириў, мәденият, спорт, илим ҳәм технологиялар министрлиги менен биргеликте шөлкемлестирилген гезектеги форум “Билим ҳәм жәмийет арасындағы үнлеслик: инсан раўажланыўы ҳәм инновациялар жолында пәнлераралық қатнаслар” атамасында өткерилмекте.

Илажда министрликлер, Япониядағы 15 тен аслам ҳәм Өзбекстаннан 30 ға шамалас жетекши жоқары билимлендириў мәкемелериниң басшылары қатнаспақта.

Форумның ашылыў мәресиминде Олий Мажлис Сенаты баслығының биринши орынбасары Содиқ Сафоев, Өзбекстан жоқары билимлендириў, илим ҳәм инновациялар министри Қоңыратбай Шарипов, Япония билимлендириў, мәденият, спорт, илим ҳәм технологиялар министриниң орынбасары Хироши Масуко, Японияның елимиздеги айрықша ҳәм толық ҳуқықлы елшиси Кэнжи Хирата, Самарқанд мәмлекетлик университетиниң ректоры Рустам Холмуродов ҳәм басқалар шығып сөйлеп, кейинги жылларда дәстүрий түрге енген бул илаж еки мәмлекет арасындағы билимлендириў, илим ҳәм инновациялар тараўындағы бирге ислесиўди беккемлеў, илимий-изертлеў жойбарларын раўажландырыў және академиялық алмасыўларды буннан былай да кеңейтиўге хызмет етип атырғанын атап өтти.

– Кейинги жылларда Өзбекстан ҳәм Япония арасындағы бирге ислесиў жаңа басқышқа көтерилди, – деди Қоңыратбай Шарипов. – Ҳәзир мәмлекетимиздеги алты жоқары билимлендириў мәкемесинде япон тили системалы түрде оқытылып келинбекте. 1184 студент япон тилин тийкарғы бағдар ҳәм биринши шет тили сыпатында, 500 ден аслам студент болса екинши шет тили сыпатында оқымақта. Өз гезегинде, Япония жоқары оқыў орынларында 2315 өзбекстанлы студент билим алмақта. Бизиң тийкарғы мақсетимиз – университетлер арасындағы исенимди беккемлеп, бирге ислесиўди анық нәтийже беретуғын жойбарларға айландырыў болып табылады.

Форумның жалпы мәжилисинде еки мәмлекет жоқары билимлендириў мәкемелериниң басшылары ҳәм абырайлы экспертлер тийкарғы баянатлары менен қатнасты. Билимлендириў, илим ҳәм инновациялар тараўындағы бирге ислесиў перспективалары, инсан капиталына инвестиция киргизиў, пәнлераралық қатнаслар тийкарында интеллектуаллық жәмийетти қәлиплестириў ҳәм биргеликтеги илимий-изертлеў бағдарларын раўажландырыў мәселелери додаланды.

Илаж шеңберинде еки мәмлекет жоқары билимлендириў мәкемелери арасында өз-ара бирге ислесиў меморандумларына қол қойылды. Соның ишинде, Шараф Рашидов атындағы Самарқанд мәмлекетлик университети ҳәм Цукуба университети арасында бирге ислесиў бойынша келисимге ерисилди.

Ғолиб Ҳасанов, ӨзАның хабаршысы