Устаз дөретиўши, Өзбекстан Қаҳарманы Эркин Воҳидов ана тилимиздиң мийнеткеш қорғаўшысы, ғамқоры, сақшысы, үгит-нәсиятлаўшысы, ғәзийнешиси еди. Шайырдың дөретиўшилиги арқалы ана тилимиздиң бийтәкирарлығы, гөззаллығы көрсетиледи.

Елимизде Эркин Ваҳидов атындағы дәстүрий өзбек тили республикалық өзбек тили ҳәм әдебияты пән олимпиадасының финал басқышы ҳәм “Өзбек тили байрамы”на бағышланған фестиваль салтанатлы түрде шөлкемлестирилди.

“Э Воҳ” деп аталған бул ағартыўшылық жойбар Мектепке шекемги ҳәм мектеп билимлендириўи министрлиги, Жоқары билимлендириў, илим ҳәм инновациялар министрлиги, УзРепорт мәлимлеме агентлиги, Халықаралық Нордик университети ҳәм бирге ислесиўши шөлкемлер менен биргеликте өткерилди. Жойбар илажлары Ташкент қаласы ҳәм Ташкент ўәлаятының Бостанлық районында болып өткени итибарға ылайық.

Олимпиада өзбек тили ҳәм әдебиятын терең үйрениў, алдынғы педагогикалық қатнасларды үгит-нәсиятлаў ҳәм муғаллимлердиң кәсиплик потенциалын арттырыўға қаратылған әҳмийетли жойбар болып есапланады.

Биринши басқышта республиканың барлық аймақларынан 10 мыңнан аслам оқытыўшы қатнасты. Олардың арасынан таңлап алынған 79 устаз Нордик университети базасында болып өткен финал басқышында шығарма жазыў ҳәм тест сынақларында өз билим ҳәм шеберликлерин көрсетти.

Илаж шеңберинде тил ҳәм әдебияттың әҳмийетли мәселелерине бағышланған илимий-әмелий сәўбетлер, методикалық презентациялар ҳәм мәдений бағдарламалар шөлкемлестирилди.

Қатнасыўшылар “Жазыўшылар қыябаны”на барып, дөретиўшилер менен сәўбетлести.

Ташкент ўәлаяты Бостанлық районындағы “Green Hills Resort” дем алыў орнында олимпиада жеңимпазларын сыйлықлаў мәресими ҳәм “Өзбек тили байрамы” фестивалы болып өтти.

Онда министрликлер ҳәм уйымлардың басшылары, халықаралық шөлкемлердиң ўәкиллери, сырт ел елшиханалары, белгили жазыўшы ҳәм шайырлар және жәмийетшилик ўәкиллери қатнасты.

Жеңимпазларды Жоқары билимлендириў, илим ҳәм инновациялар министри Қоңыратбай Шарипов, Мектепке шекемги ҳәм мектеп билимлендириўи министри Эъзозахон Каримова, УзРепорт агентлигиниң Бас директоры Равшанхон Жўраев ҳәм Нордик университети ректоры Шерзод Мустафоқулов қутлықлады.

Белсенди қатнасыўшылар ҳәм жеңимпазлар диплом, сертификат, ақшалай сыйлықлар ҳәм естелик саўғалары менен сыйлықланды.

Байрам кешесинде белгили дөретиўшилердиң қатнасыўында концерт бағдарламасы, қосық оқылыўы болып өтти.

“Э Воҳ-2025” олимпиадасы тек ғана тил ҳәм әдебият бойынша билимлер жарысы емес, ал ана тилимиздиң абырайы ҳәм мәдений қүдиретин жоқарылататуғын, илимий-ағартыўшылық бирге ислесиўди күшейтетуғын әҳмийетли майданға айланды.

Н.Усмонова, ӨзА