Президент Шавкат Мирзиёев 16-октябрь күни космослық мониторинг арқалы жаңа экономикалық имканиятларды анықлаў бойынша усыныслар презентациясы менен танысты.

Мәмлекетимизде экономика тармақларында аэрокосмослық мағлыўматлардан пайдаланыў кеңейип бармақта. Атап айтқанда, Президенттиң 30-сентябрьдеги пәрманы менен бул бағдардағы жумыслар жаңа басқышқа алып шығылды, Санлы технологиялар министрлиги жанындағы Космослық изертлеўлер ҳәм технологиялар агентлиги геология, жер қатнасықлары ҳәм экология тараўында жылына кеминде үш мәрте мәмлекетлик космослық мониторинг өткериўи белгиленди, агентликтиң аймақлық ўәкиллери лаўазымы енгизилди.

Презентацияда атап өтилгениндей, енди космослық таллаўлар жәрдеминде экономикаға үлкен түртки беретуғын жаңа имканиятларды анықлаў зәрүр.

Республикада ҳәр жылы жүзлеген пайдалы қазылма кәнлери ҳәм карьерлер аукционға шығарылмақта. Исбилерменлерге имканият жаратылып, кәнлерге санаат алып келинбекте. Мысал ушын, өткен жылы 170, жыл басынан болса 172 кән аукционда сатылған.

Бирақ кәнлерден руқсатсыз пайдаланыў машқаласы елеге шекем әҳмийетли екени, жылдың басынан космослық мониторинг жәрдеминде 2 мыңнан аслам усындай жағдай анықланғаны атап өтилди.

Бас прокуратура алдына экономикалық жынаятлардың алдын алыў ҳәм оларды өз ўақтында ашыўда жер, өндирис объектлери ҳәм кәнлерди жасалма жолдас арқалы таллаў мағлыўматларынан нәтийжели пайдаланыў ўазыйпасы қойылды.

Кейинги жыллары өзбасымшалық пенен қурылған 1 миллион 365 мың турақ жайға кадастр рәсмийлестирип берилген. Бирақ елеге шекем бундай нызамсыз қурылысларға толық шек қойылғаны жоқ. Жыл басынан берли 33 мыңнан аслам өзбасымшалық пенен исленген қурылыс анықланған болса, олардың көпшилиги аўыл хожалығы жерлеринде жайласқан.

Усы мүнәсибет пенен қысқа мүддетте тийисли мәлимлеме платформаларын интеграциялап, нызамсыз қурылыс жағдайларын жедел үйрениў ҳәм сапластырыў имканиятын беретуғын система жаратыў тапсырылды.

Презентацияда космослық мониторинг тийкарында орынларда бос турған жерлерди анықлаў ҳәм экономикалық активке айландырыўға айрықша итибар қаратылды.

Мәмлекетимиздиң алты аймағында алып барылған үйрениўлер нәтийжесинде 300 гектарға шамалас жерлер анықланды. Бир ғана Ташкент қаласында  95 гектар бос жер участкасы табылып, аукционға шығарылған.

Президентимиз быйыл және 8 аймақта, келеси жылы барлық район орайларында үйрениўлерди жуўмақлаў ўазыйпасын қойды.

Тараўда халықаралық тәжирийбе ҳәм алдынғы шешимлерди жедел енгизиў зәрүр екенлиги атап өтилди. Жуўапкерлер бул бағдарда ислеп шығылған жойбарлар бойынша мәлимлеме берди.

Соның ишинде, космослық мағлыўматларды жасалма интеллект жәрдеминде таллап, тереклердиң кесилиўи, метан газ сызып шығыўы, қуяш панельлериниң нәтийжелилиги, жол қапламасының жағдайы, темир жол ҳәм электр тармақларындағы насазлықлар ҳәм артықша жүклемелерди анықлаў жумысларын шөлкемлестириў режелестирилген.

Сондай-ақ, презентацияда космослық тараўында билимлендириў экосистемасын жаратыў, космослық изертлеўлер ҳәм технологияларды раўажландырыў, жолдас байланыс технологияларын енгизиў арқалы мәмлекетимиздиң алыс аймақларында байланыс қамтып алыўын арттырыў бойынша усыныслар көрип шығылды. 2028-жылы Самарқандта өткерилетуғын Халықаралық астронавтика конгресине пуқта таярлық көриў бойынша тапсырма берилди.

ӨзА