Көпшиликке мәлим болғанындай,  Өзбекстан Республикасы Денсаўлықты сақлаў министри Асилбек Худаяров басшылығындағы делегация Тәжикстанның Душанбе қаласында өткерилген ҒМДАға ағза мәмлекетлердиң денсаўлықты сақлаў тараўындағы бирге ислесиў Кеңесиниң 38-мәжилисинде қатнасты.

Онда Қазақстан Денсаўлықты сақлаў министри Акмарал Алназарова менен усы жылы 13-17-октябрь күнлери елимиздиң төрт аймағында Қазақстан медицина күнлери ҳәм “Өзбекстан – Қазақстан” медицина форумын шөлкемлестириў мәселеси додалап, келешекте кадрлар таярлаў ҳәм тәжирийбе алмасыў көлемин кеңейтиўге келискен еди.

Илаж шеңберинде Самарқанд, Бухара, Ферғана ўәлаятлары қатарында Қарақалпақстан Республикасына 13-октябрь сәнесинде Қазақстан Республикасынан бир қатар тәжирийбели медицина хызметкерлери жетип келди.

Қарақалпақстан медицина институты клиникасында болып өткен ушырасыўда Қарақалпақстан медицина институты ректоры, Республикалық қәнигелестирилген кардиология илимий-әмелий медицина орайы Қарақалпақстан Республикасы аймақлық филиалы, Республикалық қәнигелестирилген ана ҳәм бала саламатлығы илимий-әмелий медицина орайы Қарақалпақстан Республикасы филиалы, Республикалық қәнигелестирилген дерматовенерология ҳәм косметология илимий-әмелий медицина орайы Қарақалпақстан Республикасы аймақлық филиалы, Республикалық қәнигелестирилген эндокринология илимий-әмелий медицина орайы Қарақалпақстан филиалы директорлары Қазақстан Республикасынан келген бир қатар ўәкиллер менен сөйлесиўлер өткерип, өз-ара бирге ислесиў меморандумына қол қойды.

Ушырасыў шеңберинде алдағы әмелге асырылатуғын илажлар режеси додаланып, келешектеги бирге исленетуғын жумыслар белгилеп алынды.

Қарақалпақстан хабар агентлиги