2025-жыл 2-11-октябрь күнлери Саудия Арабстаны Патшалығында «Өзбекстан мәденият күнлери» болып өтпекте. Бул илаж Өзбекстан мәдений мийрасын, көркем өнерин ҳәм миллий қәдириятларын халықаралық көлемде үгит-нәситялаўға қаратылған.

“Өзбекстан мәденияты күнлери” бағдарламасынан көркем өнер шеберлериниң концерт бағдарламалары, миллий тағамлар, өнерментшилик буйымлары ҳәм мәдений павильон көргизбелери, сийрек ушырасатуғын қолжазбалардың нусқалары, китап ҳәм миллий әдебият үлгилери көргизбеси сыяқлы бағдарламалар орын алған.

Илаж Ар-Рияд қаласындағы Riyadh International Book Fair комплекси ҳәм Malika Nurah Bint Abdulrahmon университети майданында шөлкемлестирилмекте.

“Өзбекстан мәденияты күнлери” дәслеп 2011-жыл 25-31-март күнлери Саудия Арабстаны Патшалығында шөлкемлестирилген еди. Өз гезегинде, бул мәмлекеттиң мәденият ўәкиллери елимизде өткерилетуғын “Шарқ тароналари” халықаралық музыка фестивалы, “Мақом” әнжуманы, “Ләзги” халықаралық аяқ ойын фестивалы сыяқлы абырайлы илажларда турақлы қатнаспақта.

Өзбекстан Республикасы ҳәм Саудия Арабстаны Патшалығы арасындағы бирге ислесиў кейинги жылларда избе-из раўажланып, әсиресе, мәдений-гуманитарлық тараўда жаңа басқышқа көтерилмекте. Еки мәмлекет арасындағы мәдений байланыслардың ҳуқықый тийкары 1995-жыл 18-ноябрьде қол қойылған «Саўда, экономика, инвестициялар, техника, мәденият, спорт ҳәм жаслар ислери тараўларында бирге ислесиў ҳаққында»ғы Келисимге  барып тақалады.

Ҳәзирги күнлерде Саудия Арабстаны Патшалығында болып өтип атырған «Өзбекстан мәденият күнлери» шеңберинде Өзбекстан биринши мәрте “Riyadh  International Book Fair” фестивалында “Ҳүрметли мийман мәмлекет” сыпатында қатнаспақта. Мәденият  министри  Озодбек  Назарбеков усы  фестивальда болды.

Бул ири халықаралық илаж Саудия Арабстаны пайтахты Ар-Риёд қаласында ҳәр жылы өткерилетуғын халықаралық китап фестивалы болып есапланады ҳәм 10 күн даўам етеди. Онда 2 мыңнан аслам баспа өз өнимлери менен қатнасады.

Әдетте бул фестивальдың ҳүрметли мийманлары сыпатында араб мәмлекетлеринен мирәт етиледи. Соңғы 10 жыл даўамында биринши мәрте Өзбекстан бул фестивальға ҳүрметли мийман сыпатында қатнаспақта. “Riyadh  International Book Fair” фестивалы тек ғана китаплар көргизбеси емес, ал мәдениятлардың ушырасыўы, билим ҳәм илҳам дереги болып есапланады.

Илаж шеңберинде мәденият министрлери арасында бирге ислесиў ушырасыўы болып өтти. Өзбекстан Республикасы мәденият министри Озодбек Назарбеков ҳәм Саудия Арабстаны Патшалығы мәденият министри Бадир бин Абдулла бин Муҳаммад бин Фарҳан Ал Сауд мәдений-ағартыўшылық бирге ислесиўдиң жаңа перспективаларын белгилеп алды.

«Өзбекстан мәденияты күнлери» даўам етпекте.

Н.Усмонова, ӨзА