Өзбекстан Республикасы Президенти Шавкат Мирзиёев 28-август күни елимизде әмелий сапар менен болып турған Америка Қурама Штатлары Президентиниң глобал шерикликлер бойынша арнаўлы ўәкили Паоло Замполлиди қабыллады.

АҚШ администрациясының жоқары мәртебели ўәкили мәмлекетимиз басшысына Президент Дональд Трамптың қызғын сәлеми ҳәм Өзбекстан ғәрезсизлиги күни мүнәсибети менен қутлықлаўын жеткерди.

Ушырасыўда Өзбекстан менен АҚШ арасындағы стратегиялық шериклик ҳәм көп тәреплемели бирге ислесиў қатнасықларын буннан былай да кеңейтиў мәселелери ҳәр тәреплеме көрип шығылды.

Ҳәр қыйлы дәрежелерде нәтийжели байланыслар даўам етип атырғаны айрықша қанаатланыўшылық пенен атап өтилди. Конструктивлик сиясий сөйлесиў раўажланбақта, жедел парламентлераралық алмасыўлар әмелге асырылмақта. Өткен айда Конгрессте Өзбекстан күни шеңбериндеги илажлар өткерилди, быйыл гүзде Кеңейтилген стратегиялық шериклик қарым-қатнасының биринши мәжилиси болып өтеди.

Қәўипсизлик тараўында, терроризм, экстремизм ҳәм нызамсыз миграцияға қарсы гүресиў бағдарында нәтийжели бирге ислесиў жолға қойылған.

АҚШ дәстүрий түрде Өзбекстанның әҳмийетли экономикалық шериги болып есапланады. 2024-жылы товар алмасыўдың көлеми 15 процентке көбейди. Жойбарлар портфели 11 миллиард доллардан артқан.

Усы жылдың июнь айында өткерилген Ташкент инвестиция форумында АҚШтың 100 ден аслам жетекши компаниялары қатнасты.

Минерал ресурслар, авиация, электротехника, аўыл хожалығы, санлы технологиялар, қаржы, инновациялар, билимлендириў ҳәм басқа да тийкарғы бағдарларда кооперациялық жойбарларды алға қойыўға үлкен потенциал бар екенлиги атап өтилди.

“С5+1” форматы шеңберинде регионаллық бирге ислесиўди раўажландырыў әҳмийетли екени атап өтилди.

Болажақ сөйлесиўлер ҳәм биргеликтеги илажлардың режеси де көрип шығылды.

ӨзА