Саудияның “The Independent Arabia” басылымы Дамасктағы жоқары мәртебели дәреклерге сүйенип, Сирия ҳәм Израиль 25-сентябрь күни АҚШтың қатнасыўында қәўипсизлик шәртнамасына қол қойыўды режелестирип атырғаны ҳаққында жазды. Мәресимде Президент Дональд Трамп қатнасыўы күтилмекте.

Басылымның жазыўынша, илаждан бир күн алдын Сирия жетекшиси Аш-Шара Нью-Йоркта БМШ Бас ассамблеясында шығып сөйлейди.

– Шәртнамаға қол қойылыўы толық тынышлық орнатылыўын аңлатпайды,  – делинеди хабарда. – Бул еки мәмлекет арасындағы кескинликти азайтыўға қаратылған, тек  шекленген қәўипсизлик илажын нәзерде тутатуғын ҳүжжет ғана.

Израиль бул билдириўге еле рәсмий түсиник бермеген. Егер мағлыўмат тастыйықланса, бул 1948-жылдан берли рәсмий түрде урыс жағдайында қалып атырған Израиль ҳәм Сирия қатнасықларында мисли көрилмеген қәдем болады.

Қарақалпақстан хабар агентлиги