Өзбекстанда санааттың раўажланыўын ҳәм минерал ресурслардан нәтийжели пайдаланыўды тәмийинлеў мақсетинде гезектеги әҳмийетли қәдем тасланды. “Өзбекстан технологиялық металлар комбинаты” акционерлик жәмийети ҳәм “Таў-кән ҳәм геология тараўы хызметкерлериниң маманлығын арттырыў институты” мәмлекетлик мәкемеси арасында өз-ара бирге ислесиў ҳаққындағы келисимге қол қойылды.

Бул келисим шеңберинде санаат ушын әҳмийетли минераллар бағдарында лаборатория қәнигелерин ҳәм жойбар басшыларын таярлаў, олардың билим ҳәм көнликпелерин заманагөй талапларға сәйкес түрде арттырыў режелестирилген. Сондай-ақ, билимлендириў процесслерине сырт елли экспертлер тартылып, алдыңғы тәжирийбелер тийкарында әмелий сабақлар шөлкемлестириледи.

Бағдарламаның тийкарғы мақсети – қәнигелердиң маманлығын арттырыў менен бирге, минерал ресурслар тараўында өндирис процесслериниң нәтийжелилигин тәмийинлеў, инновациялық шешимлерди енгизиў ҳәм лабораториялық жумыс усылларын жетилистириў болып есапаланады. Әмелиятқа бағдарланған оқыў бағдарламалары арқалы оқыўшылар тараўдың реал шараятларында ислеў көнликпесин қәлиплестиреди.

Тәреплердиң пикиринше, бундай бирге ислесиў тек ғана жумысшы күшиниң бәсекиге шыдамлылығын арттырып қоймастан, ал мәмлекетимизде минерал ресурсларды қайта ислеў ҳәм олардан нәтийжели пайдаланыўда әҳмийетли орын ийелейтуғын жаңа әўлад қәнигелерин жетистириўге де хызмет етеди.

Н.Зиёдуллаева, ӨзА