Олий Мажлис Сенатының Баслығы Танзила Норбоева басшылығындағы Өзбекстан делегациясы Швейцарияның Женева қаласында Парламентлераралық Аўқам (ПА)ға ағза мәмлекетлер парламентлери ҳаял спикерлериниң инклюзив ҳәм узақ мүддетли тынышлық жолында жетекшилик темасына бағышланған 15-саммитинде қатнаспақта.

Бул халықаралық платформа парламентлердиң ҳаял спикерлерин, сондай-ақ, инклюзивлик, тынышлық ҳәм турақлы раўажланыўды алға қойыўға үлес қосып атырған абырайлы халықаралық экспертлерди бирлестирди.

Саммит бағдарламасы ҳаял-қызлардың тынышлық ҳәм қәўипсизликти тәмийинлеўдеги ролин, соның ишинде, БМШ Қәўипсизлик кеңесиниң 1325-санлы резолюциясын әмелге асырыў көзқарасынан додалаўды, сондай-ақ, климат өзгериўи, жасалма интеллектти раўажландырыў, гендер ҳәм расалық тийкардағы онлайн зорлық сыяқлы заманагөй қәўип-қәтерлерди көрип шығыўды нәзерде тутады.

Саммиттиң биринши сессиясы шеңберинде “Ҳаял-қызлар, тынышлық ҳәм қәўипсизлик” күн тәртибиниң 25 жылдан кейинги нәтийжелери ҳәм перспективалары – сақланып қалып атырған қәўип-қәтерлер ҳәм раўажланыў жоллары додаланады.

Екинши сессияда қатнасыўшылар жаңа глобаллық қәўип-қәтерлерди жеңип өтиў жолларын көрип шығады ҳәм табыслы тәжирийбе алмасады.

Дебатлар да болып өтеди, оларда спикер ҳаяллар гендер теңлик ҳәм санлы қәўип-қәтерлер менен байланыслы әҳмийетли мәселелер бойынша өз пикирин билдиреди.

Саммит шеңберинде Олий Мажлис Сенаты Баслығының шығып сөйлеўи ҳәм еки тәреплеме ушырасыўлар өткериў режелестирилген.

Н.Абдураимова,

ӨзА