IRNA мәлимлеме агентлиги Шанхай бирге ислесиў шөлкемине ағза мәмлекетлердеги тараў министрлериниң Қытайда болып өткен сегизинши мәжилиси шеңберинде Иран денсаўлықты сақлаў, емлеў ҳәм медициналық билимлендириў министри Муҳаммад Ризо Зафарқандий өзбекстанлы кәсиплеси Асилбек Худоёров пенен ушырасқанын сәўлелендирди.

Мәжилисте Қытай, Ҳиндстан, Қазақстан, Россия ҳәм Тәжикстаннан жуўапкерлер ҳәм Жәҳән денсаўлықты сақлаў шөлкеминиң жоқары мәртебели ўәкиллери қатнасқан.

24-апрель  күни басланған «Денсаўлықты  турақлы раўажландырыў ҳәм улыўма саламат келешекке жәрдем бериў»  темасындағы бир ҳәптелик илажда тийкарғы итибар басланғыш медициналық жәрдем арқалы системаның турақлылығын күшейтиў, қәўип ҳәм айрықша  жағдайларды басқарыў, телемедицина ҳәм жасалма интеллект сыяқлы санлы технологиялардан пайдаланған ҳалда хызметти жақсылаў, дәстүрий медицинаны раўажландырыў   бойынша бирге ислесиўши беккемлеўге қаратылады.

Зафарқандий Иран ҳәм Өзбекстан арасында денсаўлықты сақлаў тараўындағы бирге ислесиўди  кеңейтиў мәселесине тоқтап, жумысты нәтийжели даўам еттириў ушын еки мәмлекет ўәкиллеринен ибарат бирге ислесиўши жумысшы топар дүзилетуғынын мәлим етти. Мәмлекети баўыр трансплантациясы, рак, клетка ҳәм ген терапиясы, жүрек-қан тамыр хирургиясы сыяқлы әҳмийетли бағдарларда шерикликке таяр екенлигин билдирди. Сондай-ақ,  туризм  денсаўлықты сақлаў дипломатиясын раўажландырыў ушын жақсы тийкар болып ҳәр еки мәмлекетке салмақлы пайда келтиретуғынына итибар қаратты.

Иран денсаўлықты сақлаў министриниң орынбасары, азық-аўқат ҳәм дәри-дәрмақлар басқармасының басшысы Маҳдий Бирсолиҳий фармацевтика тараўындағы бирге ислесиў дәри-дәрмақларды өз-ара дизимге алыўды тезлестириў  арқалы кеңейиўине үмит билдирди.

Өз гезегинде А.Худоёров терең тарийхқа ийе Иран – Өзбекстан  қатнасықларын және де раўажландырыў улыўма пайда келтиретуғынына, ҳәзирге шекем ерисилген келисимлер  турмысқа нәтийжели енгизилип атырғанына әҳмийет қаратты.

Медициналық билимлендириў темасына айрықша тоқталған Өзбекстан министри профессор-оқытыўшылар  ҳәм студентлерди кең ҳәм тар қәнигеликлер бойынша  тәжирийбе алмасыўға шақырды.

ШБШға ағза мәмлекетлер денсаўлықты сақлаў министрлериниң 8-мәжилисинде еки ҳүжжетке қол қойылыўы күтилмекте. Әнжуман декларациясы ҳәм тез медициналық жәрдем көрсетиў бойынша ҳәрекет режеси.

Муҳаррама Пирматова, ӨзА