Жақында «Өзбекнефтьгаз» акционерлик жәмийети делегациясы Бирлескен Араб Әмирликлериниң Абу Даби  ҳәм Дубай қалаларында хызмет сапары менен болып, бир қатар халықаралық инвесторлар ҳәм қаржы институтлары менен сөйлесиўлер өткерди.

Сапар  шеңберинде делегация халықаралық  банклер, институционал инвесторлар ҳәм ири қаржы компанияларын ўәкиллери менен сөйлесиўлер алып барды.

Сөйлесиўлерде БАӘниң жетекши қаржы ҳәм инвестиция шөлкемлери – “Abu Dhabi Investment Authority” (ADIA), “First Abu Dhabi Bank”, “Abu Dhabi Commercial Bank”, “Abu Dhabi Fund for Development” (ADFD), “Mashreq Capital”, “Market Securities”, “Arqaam”, “BHM Capital” ҳәм  “Brevan Howard” сыяқлы абырайлы компаниялары қатнасты.

Ушырасыўларда «Өзбекнефтьгаз» АЖ тәрепинен соңғы жылларда әмелге асырылған реформалар, ири инвестиция жойбарлары, қаржылай турақлылықты тәмийинлеўдеги нәтийжелер  ҳәм компанияның келешектеги стратегиялық режелери ҳаққындағы толық мағлыўмат берилди.

Сондай-ақ, тәреплер тараўдағы әҳмийетли жаңалықлар, глобал энергетика базарындағы тенденциялар, инвестиция орталығы ҳәм перспективалы бирге ислесиў бағдарлары  бойынша пикир алысты.

Жәмийет мәлимлеме системасының мәлим етиўинше, бул сөйлесиўлер «Өзбекнефтьгаз»  АЖның халықаралық қаржы базарындағы статусын беккемлеў, тиккелей  сырт ел инвестицияларын тартыў ҳәм узақ мүддетли бирге ислесиўди жолға қойыўда үлкен әҳмийетке ийе.

Н.Зиёдуллаева, ӨзА