25-март күни барлық аймақларда сақаўат дастурханлары жайылып, ифтарлық мәресими өткерилди. Президент Шавкат Мирзиёев Ташкент қаласында өткен ифтарлықта қатнасты.

Илаж даўамында мәмлекетимиз басшысы халқымызды ҳәм улыўма мусылман үмметин мубәрек Рамазан айы менен және бир мәрте қутлықлады. -Бул шарапатлы айда гөззал диярымызда, мине, усындай пайызлы ифтарлық мәресимин елимиз бенен биргеликте өткериў несип еткени ушын меҳрибан ҳәм қүдиретли Алла- таалаға шексиз шүкирлер айтамыз, – деди Президент.

Мәмлекетимизде “Инсан қәдири ушын, инсан бахыты ушын” деген жақсы идея барлық ислеримизде тийкарғы дәстүрге айланбақта. Аймақлардың ҳуқықлары, ҳүждан еркинлиги тәмийинленип атырғаны Рамазан айында және де айқын көринбекте. Муққадес динимиз буйырған қайырлы әмеллер – аўызбиршилик, меҳир-сақаўат, сабырлылық, әдеп-икрамлылық, илим-ағартыўшылық пазыйлетлери жәмийетимизде барған сайын беккемленип  бармақта.

Ислам дининиң инсаныйлық мазмунын терең үйрениў, уллы  тарийхымыз ҳәм мәдениятымыздың дүрданаларын, уллы алымларымыздың бай мийрасын жыйнаў ҳәм кеңнен үгит-нәсиятлаўға айрықша итибар қаратылмақта. Атап айтқанда, усы мақсетте, пайтахтымызда Ислам цивилизациясы орайы қурылмақта. Бул үлкен илимий-мәнаўий жойбар неше мың жыллық раўажланыў жетискенликлерин өзинде жәмлеген, ислам цивилизациясы елимизде, әйне, илим, тәлим-тәрбия, мәденият ҳәм ағартыўшылық тийкарында раўажланғанын тастыйықлайды, жасларымызды уллы ашылыўларға руўҳландырады.

Самарқандта ҳәдис илиминиң султаны Имам Бухарий комплексиниң қурылысы да жедел даўам етпекте. Уллы  ата-бабамыздың өмири ҳәм ислерине  бағышланған музей ҳәм илимий  жоқары оқыў орынлары менен бирге, 10 мың адамлық мешит қурылмақта. Бул еки  саўлатлы естелик усы жылы ашылыўы режелестирилген.

Президентимиздиң  14-марттағы қарарына муўапық, быйыл Имам Матуридий туўылған күниниң 1155 жыллығы кеңнен белгиленеди. Оның Самарқандтағы мүбәрек зыярат орны және де абат етиледи, бай илимий мийрасы  ҳәм матуридийлик тәлиматы сырт ел илимпазлары менен биргеликте үйрениледи.

Елимиздеги  түрли миллет ҳәм дин ўәкиллери арасында аўызбиршиликти күшейтиў мақсетинде усы жыл сентябрьде және бир илаж – Ташкент ҳәм  Самарқанд қалаларында “Декларациялар қарым-қатнасы форумы” өткериледи. Бул халықаралық әнжуман түрли диний исеним ўәкиллери арасында өзине сай ағартыўшылық сөйлесиў майданы болады.

Конституциямызға муўапық, Өзбекстан социаллық мәмлекет статусына ийе болып, халықшыл ҳәм адамгершилик сиясат жүргизилмекте. Атап айтқанда, өткен жылдың өзинде жәрдемге мүтәж инсанларға 16 триллион сумлық материаллық жәрдем ҳәм напақалар берилген. Кем тәмийинленген шаңарақларға  тийисли 51 мың бала бақшаға жайластырылған, олардың 176 мың ағзасына медициналық жәрдем көрсетилип, 182 мыңы социаллық хызметлер менен  қамтып алынған.

“Сақаўат ҳәм жәрдем” қоры арқалы 94 мыңға шамалас кем тәмийинленген шаңарақларға емлениў, азық-аўқат, кийим-кеншек, коммуналлық төлемлер менен байланыслы 130 миллиард сумлық қәрежетлер қаплап берилген.

“Ҳаял-қызлар дәптери” шеңберинде 3,5 миллион ҳаял-қызға 5 триллион 700 миллиард сумлық жәрдем ажыратылған. “Жаслар дәптери” енгизилгенинен берли 1 миллион 300 мың мүтәжға 1 триллион 700 миллиард сумлық социаллық жәрдем көрсетилген.

Буннан тысқары, елимиз  ҳажыларының басламасы менен кем тәмийинленген, бағыўшысын жойытқан, мүтәж шаңарақларға 6 миллиард 300  миллион сум муғдарында материаллық жәрдемлер көрсетилген.

Елимизди абат етиў, нәл егип, бағ жаратыў да саўаплы ис. “Жасыл мәкан” улыўма миллий жойбары, әне, усы мақсетке қаратылған. Ҳәзирги  бәҳәр пасылының өзинде диний тараў хызметкерлери тәрепинен 10 мың түптен аслам терек, 32 мың түпке шамалас гүл егилди, мешит ҳәм зыярат орынларының әтирапы абат етилди.

“Қоршаған орталықты қорғаў ҳәм “жасыл” экономика жылы”на байланыслы мәмлекетлик бағдарлама шеңберинде тәбиятқа сүйиспеншилик көлеми және де кеңеймекте. Жақында Хийўа қаласында өткерилген Конфессиялараралық кеңес мәжилисинде  елимиздеги диний конфессиялардың ўәкиллери  усы мәмлекетлик бағдарламада белсене қатнасыў бойынша мүрәжат қабыл етти.

Бул ифтарлық мәресиминде де сырт мәмлекетлердиң елшилери, халықаралық шөлкемлер ҳәм  диний конфессиялардың ўәкилллери жәмленгени  елимиздеги кеңпейиллик ҳәм татыўлықтың және бир көриниси болды.

Мәмлекетимиз басшысы өзиниң шығып сөйлеген сөзинде дүньядағы жағдайға  да тоқтап өтти. Көпшилик  келиспеўшиликлер, әйне, ислам дүньясында жүз берип атырғаны өкиниш пенен атап өтилди.

Тынышсызлық  ошақлары қәлеген ўақытта кеңейип кетиўи мүмкин екенлиги,  мусылман мәмлекетлеринде тынышлық ҳәм турақлылықты тәмийинлеў ушын аўызбиршилик ҳәм ислам үмметиниң бирлигин және де беккемлеў ҳәр  қашанғыдан да әҳмийетли екени атап өтилди.

Оның ушын, биринши гезекте, жасларды жат идеялар тәсиринен сақлаў,  илим-ағартыўшылыққа бағдарлаў итибар орайында турыўы керек.

Усы ҳаққында сөз етип, Шавкат Мирзиёев Баҳаўаддин Нақшбандтың  “Қолың мийнетте, кеўлиң Аллада болсын”, деген  сөзин ядқа алды. Жасларымызды, мине, усындай руўхта тәрбиялаў, оларды мийнет ҳәм кәсипке  үйретиў оғада әҳмийетли екенин атап өтти.

Ҳәзирги күнлерде “Рамазан – сақаўат, аўызбиршилик ҳәм кеңпейиллик айы” сүрени астында елимиздеги 9 мың 500 ге шамалас мәҳәлледе кем тәмийинленген шаңарақларда ифтарлық дастурханлары жайылып, олардың аўҳалынан хабар алынды. Бундай қайырлы ислер инсан қәдирин улығлаў, пәк  мақсетли барлық ўатанласларымызды және де бирлестириўге хызмет етеди.

• Әлийшер Наўайы бабамыз айтқандай, “Жақсылардың иси – жақсылық ислеў”. Шынында да, бул өмир, сол ийгиликли ислер ҳәм жақсылық себепли бәрқулла жарқын ҳәм даўамлы болып есапланады, – деди Шавкат Мирзиёев.

Нийетлер қабыл болатуғын мүбәрек Рамазан айында, Қәдир кешеси қарсаңында турып, жақсы тилеклер айтылды.

Қуран оқылды. Алладан пүткил дүньяда тынышлық, елимизде абаданшылық, мийрим-шәпәәт бәрқулла болыўын сорап, патиялар оқылды.

Елимиздиң  барлық аймақларында өткен ифтарлық илажларында нуранийлар, зыялылар, түрли дин ҳәм конфессиялардың  ўәкиллери, майыплығы болған ҳәм мүтәж адамлар, улыўма 60 мыңға шамалас адамлар қатнасты.

ӨзА