Футбол бойынша Англия Премьер Лигасы ойынлары Өзбекстандағы жергиликли телеканалда көрсетилиўи мүмкин.

Бул ҳаққында футбол шолыўшысы Отабек Жўраев өзиниң телеграмдағы бетинде мәлим етти:

«Zo‘r TV APL шеңбериндеги Абдуқодир Ҳусановтың ойынларын көрсетеди! АПЛдың ҳәр турында канал тәрепинен еки ушырасыў трансляция етиледи. Биринши ойын бул, түсиникли – «Манчестер Сити» ойыны. Екиншиси болса «Ливерпул», «Арсенал», «Челси», «Манчестер Юнайтед», «Тотенҳем» яки басқа инглиз брендине тийисли ойын», деп жазған Sport TV ҳәм Futbol TV футбол шолыўшысы Отабек Жўраев.

Футбол бойынша Испания чемпионаты беллесиўлерин әйне усы каналда шолып киятырған Даврон Файзийев бул мағлыўматлар рәсмий күшке ийе емес екенин атап өтти.

«Бул мағлыўмат еле рәсмий емес. Әлбетте, Zo‘r TV бүгинги күнде барлық футбол ықласбентлери көриўди қәлеп атырған «Сити» ҳәм АПЛдың басқа топ клублары ойынларын көрсетиў ушын ҳәрекетте. Биз де бул унамлы шешилиўин күтип атырмыз. Бул процесс қурамалы. Мейли, көрейик», дейди футбол шолыўшысы Даврон Файзийев.

Мағлыўмат ушын, АПЛ ойынлары Өзбекстанда ақырғы мәрте UzReport ҳәм Futbol TV тәрепинен мәмлекет аймағында көрсетилген еди.

Қарақалпақстан хабар агентлиги