Нөкис қаласы орайындағы «Халықлар дослығы» майданында орнатылған жаңа жыл шыршасы әтирапында Бердақ атындағы Қарақалпақ мәмлекетлик университети тәрепинен «Жыл студенти 2024» республикалық таңлаўының университет басқышы жеңимпазларын сыйлықлаў мәресими болып өтти.
Илажда университет ректоры Ахмед Реймов студент-жасларды жаңа жыл байрамы ҳәм таңлаўда қолға киргизген табыслары менен қутлықлап, мәмлекетимиз басшысы Ш.Мирзиёев тәрепинен қарақалпақстанлы жасларға берилип атырған кең имканиятлар менен мүмкиншиликлерди атап өтти.
-Өзиниң келешегин ойлаған жасларымыз бундай кең имканияттан нәтийжели пайдаланыўы тийис ҳәм келешекте Ўатанымыздың раўажланыўы жолында пидәкерлик пенен хызмет етиў зәрүр ,-деди ректор өз сөзинде.
Буннан соң «Жыл студенти 2024» таңлаўының университет басқышы жеңимпазлары ҳәм жәмийетлик жумысларда белсендилик көрсетип жүрген бир қатар студентлер анықланып, олар университет ректораты тәрепинен мүнәсип түрде хошаметленди.
-Өткерилген таңлаў жуўмағында, «Жылдың ең белсенди зийрек студенти» номинациясы бойынша 1-орынды ийелеп, ректорымыз тәрепинен үш миллион сумлық ваучер менен сыйлықландым. Бизлердиң азы-кем ислеген дөретиўшилик ислеримизди инабатқа алып, салтанатлы түрде сыйлықлап атырғаны ушын университет басшылары ҳәм таңлаў төрешилерине өзимниң терең миннетдаршылығымды билдиремен,-дейди көркем өнер факультетиниң 4-курс студенти Гүлзада Қудайбергенова.
Мағлыўмат ушын айтатуғын болсақ, «Жыл студенти» республикалық таңлаўының университет басқышында студент-жаслар 7 номинация бойынша қатнасып, онда үзликсиз (академиялық тәнеписсиз) күндизги билимлендириў түринде оқып атырған 2-3 ҳәм 4-курс студентлери арасында қатнасыўшылардың усы жылда өзлери тәрепинен жаратылған илимий жумыслары, ойлап табыўлары, инновациялық идеялары, рационализаторлық усыныслары, шөлкемлестириўшилик қәбилети ҳәм усы тийкарда өзи шөлкемлестирген илажлар, қолға киргизген табыслары, олардың жаңалығы, илимий әҳмийетлилиги төрешилер тәрепинен көрип шығылып, мүнәсип баҳаланды.
Илаж мәденият хыметкерлери тәрепинен таярланған концерт бағдарламасы менен даўам етти.
Адилбай Оразов,
Қарақалпақстан хабар агентлиги шолыўшысы