17-декабрь күни Қатарда FIFA тәрепинен өткерилген The Best сыйлығының ҳәр бир номинацияси бойынша жеңимпазлары жәрияланды. Оған бола, «Реал» футболшысы Винисиус Жуниор «Жылдың ең жақсы ойыншысы» деп табылды.

Жеңимпазлық ушын болған гүресте ол Жуд Беллингем, Дани Карвахаль, Килиан Мбаппе, Федерико Вальверде (барлығы «Реал»), Эрлинг Холанд, Родри («Манчестер Сити»), Тони Кроос, Лионель Месси («Интер Майами»), Флориан Вирц («Байер») ҳәм Ламин Ямал («Барселона») сыяқлы футболшыларды артта қалдырыўға еристи.

Ал, «Жылдың ең жақсы тренери» номинациясында болса, «Реал» клубы тренери Карло Анчелотти ең көп даўыс топлаўға ерисип, «Арсенал» командасының буринғы устазы Арсен Венгерден арнаўлы сыйлықты қабыл етип алды.

Бул сыйлыққа даўагерлер арасында Пеп Гвардиола (“Манчестер Сити”), Лионель Скалони (Аргентина сайланды командасы), Луис де ла Фуэнте (Испания сайланды командасы) ҳәм Хаби Алонсолар (“Байер”) да бар еди.

«Жылдың ең жақсы дәрўазаманы» сыйлығы болса, “Астон Вилла” ҳәм Аргентина сайланды командасы дәрўазаманы Эмилиано Мартинеске несип етти. Бул сыйлық ушын болған гүресте Андрей Лунин (“Реал Мадрид”), Давид Рая (“Арсенал”), Эдерсон (“Манчестер Сити”) Жанлуижжи Доннарумма (“ПСЖ”) Майк Менян (“Милан”), Унаи Симон (“Атлетик”)ларды жеңип шығыўға еристи.

“Манчестер Юнайтед”тиң аргентиналы ярым қорғаўшысы Алехандро Гарначо тәрепинен 2023-жылдың 26-ноябрь күни “Эвертон” дәрўазасына акробатикалық усылда урған голы FIFA тәрепинен жыл голы деп табылып, футболшы Пушкаш сыйлығын қолға киргизди.

Лауреатлар миллий сайланды команда сәрдарлары, тренерлер, жанкүйерлер ҳәм ғалаба хабар қураллары ўәкиллериниң даўыс бериўи арқалы анықланды.

Адилбай Оразов,

Қарақалпақстан хабар агентлиги шолыўшысы