Германияның Трансфермаркт порталы Франция чемпионатында ойнап атырған футболшылардың трансфер баҳасын жаңалады.
Абдуқодир Ҳусановтың трансфер баҳасы 5 миллион евродан 12 миллион евроға көтерилген. Өзбекстанлы 20 жастағы қорғаўшының трансфер баҳасы 7 млн евроға көбейип, ол бул бойынша «Ланс»тың баҳасы ең көп көбейген ойыншысы болды.
Усы тәризде, Ҳусанов Аббосбек Файзуллаев ҳәм Элдор Шомуродовты артта қалдырып, Өзбекстанның ең қымбат ойыншысына айланды.
«ЦСКА» клубы футболшысы Аббосбек Файзуллаев 6 миллион евро баҳа менен екинши орынды ийелеп турыпты. Өзбекстан миллий командасы сәрдары ҳәм «Рома» клубы футболшысы Элдор Шомуродов 5 миллион евро менен күшли үшликтен орын алған.
Мағлыўмат ушын, Абдуқодир Ҳусановқа берилген баҳа Өзбекстан футболшылары арасындағы екинши нәтийже есапланады. Алдынырақ «Рома» клубына өткен Элдор Шомуродов портал тәрепинен 14 миллион евроға баҳаланған еди.
Қарақалпақстан хабар агентлиги