Өзбекстан Мәмлекетлик қәўипсизлик хызмети академиясына кириў ушын таңлап алыў тест сынақлары 2024-жыл 17-ноябрь күни өткериледи. Тест сынақлары бир сменада өткерилип, 10:00 ден 13:00 ге шекем даўам етеди. Сынақлар Амир Темур атындағы арнаўлы академияда әмелге асырылады. Бул ҳаққында Билимлерди баҳалаў агентлиги хабар берди.
Белгили болғанындай, талабанлар тест сынағында ана тили (өзбек, рус яки қарақалпақ,) математика, Өзбекстан тарийхы ҳәм шет тили пәнлеринен билимлерин көрсетеди. Барлық талабанларға жәми 90 тест тапсырмасы бериледи. Сынақ даўамында ҳәр 30 тапсырмаға 1 саатлық ўақыт ажыратылған болып, улыўма ўақыт 3 саатты қурайды.
Максимал 249 баллды топлаў имканияты болған бул тест сынағында талабанлар өз билимлерин сынайды. Тест тапсырмаларына жуўапларды қағазға толтырыў ҳәм белгиленген ўақыт ишинде әмелге асырылыўы керек. Талабанлар жоқары балл топлаў арқалы академияға кириў имканиятына ийе болады.
Талабанлар сынаққа кириў ушын рухсатнаманы my.uzbmb.uz сайты арқалы онлайн жүклеп алыўлары керек. Бул рухсатнама арқалы тест сынағына кириў ушын керекли мағлыўматлар бериледи. Рухсатнама талабанның шахсын тастыйықлаўшы ҳүжжетлер менен биргеликте алып келиниўи шәрт.
Тест сынағына келиўде талабанлар белгиленген ўақытқа (саат 08:30) кешикпестен жетип келиўлери керек. Шахсты тастыйықлаўшы ҳүжжетлер, мысалы, паспорт яки ИД-карта ҳәм рухсатнама тест аймағына кириўде көрсетилиўи керек, – деп мәлимлеме береди xs.uz сайты.
Қарақалпақстан хабар агентлиги