Республикалық спорт ойынлары ҳәм жеңил атлетика спорт түрлерине қәнигелескен спорт мектебинде фиджитал спорт ойынлары бойынша Өзбекстан чемпионатының Қарақалпақстан Республикалық басқышы болып өтти.
Жарыстың ашылыў мәресиминде Өзбекстан Фиджитал спорт федерациясының бөлим баслығы Хусан Насруллаев, Қарақалпақстан Республикасы Спорт министриниң орынбасары Азамат Қалбаев ҳәм басқалар шығып сөйлеп, беллесиўлерге қатнасыўшы командаларға әўметлер тиледи.
Қызықлы өткен жарыс соңында, фиджитал футбол (ФИФА 24 футбол 2х2) бойынша Өзбекстан Денетәрбия ҳәм спорт университети Нөкис филиалының «СКИФ – 1» командасы биринши, Бердақ атындағы Қарақалпақ мәмлекетлик университетиниң «ҚМУ» командасы екинши ҳәм Республикалық спорт ойынлары ҳәм жеңил атлетика спорт түрлерине қәнигелескен спорт мектебиниң «Бесқала» командасы үшинши орынларды ийелеўге миясар болды.
Ал, фиджитал баскетбол бойынша беллесиўлерде болса, 10 команда қатнасып, жарыс соңында Республикалық спорт ойынлары ҳәм жеңил атлетика спорт түрлерине қәнигелескен спорт мектебиниң «ИВС» командасы жеңимпазлықты қолға киргизиўге еристи.
Фиджитал-аяқ-ойын (Just Dance) бағдары бойынша өткерилген беллесиўлер жуўмағында, биринши орынды Шахзада Ибрагимова ҳәм Дәўлетбийке Қалилаевалар жеңип алған болса, екинши орын Лилия Ибадуллаева ҳәм Айнур Аденбаева, үшинши орын Гүлбану Кеўлимжаева ҳәм Турдыгүл Муратбекова жуплықларына несип етти.
Жарыс соңында жеңимпазлар федерация тәрепинен таярланған диплом, медаль, кубок ҳәм естелик саўғалар менен сыйлықланды.
Адилбай Оразов,
Қарақалпақстан хабар агентлиги шолыўшысы