Пайтахтымыз Нөкис қаласындағы Жаслар орайында Өзбекстан Журналистлери аўқамы Қарақалпақстан Республикасы бөлиминиң улыўмалық жыйналысы болып өтти.
Оған аўқам бөлиминиң басқарма ағзалары ҳәм ғалаба хабар қураллары ўәкиллери қатнасты.
Мәжилисте Өзбекстан Журналистлери аўқамының баслығы ўазыйпасын атқарыўшы Халмурат Салимов мәмлекетимизде Президентимиз Шавкат Мирзиеёв тәрепинен ашық-айдынлықты, баспасөз еркинлигин тәмийинлеў, Жаңа Өзбекстанның жаңа журналистикасын жаратыў мәселелерине итибар қаратылып атырғаны, журналистлердиң алдында жүз берип атырған ўақыя ҳәм ҳәдийселерди қалыс сәўлелендириў жуўапкершилиги турғанлығын айрықша атап өтти.
Өзбекстан Журналистлери аўқамы Қарақалпақстан бөлиминиң бас қәнигеси Қабыл Бегимов алып барған жыйналыста усы жылдың өткен дәўири даўамында исленген жумыслар ҳәм алда турған ўазыйпалар ҳаққында айтып, бөлимге баслық сайлаў мәселеси ортаға қойылды.
Жыйналыста бул мәселе де көрип шығылды ҳәм көрсетилген талабанлар арасынан Даўыт Абибуллаев Өзбекстан Журналистлери аўқамы Қарақалпақстан бөлиминиң баслығы етип сайланды.
Мәжилисте Қарақалпақстан Жазыўшылар аўқамының баслығы Кеңесбай Каримов, Қарақалпақстан Республикасына мийнети сиңген журналист Пердегүл Хожамуратова ҳәм басқалар көрсетилген талабанды қоллап-қуўатлап шығып сөйледи.
Д.Абибуллаев 1964-жылдың 4- август күни Шымбай районында туўылған. 1995-жылы Бердақ атындағы Қарақалпақ мәмлекетлик университетин тамамлаған. Өзиниң журналистлик дөретиўшилик жолын 1985-жылы “Ылғаллы мийнет” газетасы хабаршысы сыпатында баслаған. Соңынан “Қарақалпақстан” радиоканалында редактор, Қарақалпақстан телевидениеси редакторы, “Хожели ҳақыйқаты” газетасы хабаршысы, “Еркин Қарақалпақстан” газетасы хабаршысы, бөлим баслығы, бас редактор орынбасары, “Устаз жолы” газетасы бас редакторы, Қарақалпақстан хабар агентлиги шолыўшысы лаўазымларында жемисли мийнет ислеген.
Ҳәзирги ўақытта Өзбекстан Миллий ахборот агентлигиниң Қарақалпақстан Республикасындағы шолыўшысы болып ислеп атыр.
Мәжилис жумысына Қарақалпақстан Республикасы Жоқарғы Кеңесиниң комитет баслығы Шарапат Өтемисов қатнасып, бүгинги күни мәлимлеме ҳәм баспасөз тараўы алдында турған ўазыйпаларға кең түрде тоқтап өтти.
Адилбай Оразов,
Қарақалпақстан хабар агентлиги шолыўшысы