11-ноябрь «Кәсиплик аўқамлары күни» мүнәсибети менен республикамыздағы медицина мәкемелери хызметкерлери арасында саламат турмыс қәлпин енгизиў, оларды спортқа кеңнен тартыў мақсетинде спорттың киши футбол түри бойынша «Өзбекстан денсаўлықты сақлаў хызметкерлери кәсиплик аўқамының Қарақалпақстан Республикасы Кеңеси кубоги» спорт жарысы өткерилди.

Жарысқа республикамыздың барлық аймақларынан командалар қатнасты ҳәм кубок жеңимпазлығы ушын кескин гүрес алып барды.

Қызықлы өткен ойынлар жуўмағында, барлық қарсыласларын жеңип шығыўға миясар болған Республикалық тез медициналық жәрдем орайы Қарақалпақстан филиалы командасы «Өзбекстан денсаўлықты сақлаў хызметкерлери кәсиплик аўқамының Қарақалпақстан Республикасы Кеңеси кубоги»н жеңимпазына айланды.

Ал, сыйлы екинши орын Республика қәнигелестирилген руўхый саламатлық илимий-әмелий медицина орайының наркология хызмети бойынша Қарақалпақстан Республикасы филиалына несип еткен болса, үшинши орынды Қоңырат районлық медицина бирлеспеси командасы жеңип алыўға еристи.

Соның менен қатар, жарыста «Ең жақсы дәрўазаман», «Ең жақсы ҳүжимши», «Ең жасы үлкен қатнасыўшы», «Ең жас қатнасыўшы», «Ең жақсы ойыншы», «Ең жақсы қорғаўшы» номинациялары бойынша жеңимпазлар анықланды.

Жарыс жуўмағында жеңимпаз командалар ҳәм арнаўлы номинация жеңимпазлары, жарысқа белсене қатнасқан командалар Өзбекстан денсаўлықты сақлаў хызметкерлери кәсиплик аўқамының Қарақалпақстан Республикасы Кеңеси тәрепинен таярланған дәрежели диплом, кубок, медаль ҳәм естелик саўғалар менен сыйлықланды.

Адилбай Оразов,

Қарақалпақстан хабар агентлиги шолыўшысы