Усы жылдың 1-2 ноябрь сәнесинде Қубла Кореяның Пусан қаласында қылышласыў спортының қылыш (сабля) түри бойынша жас қызлар арасында болып өткен жәҳән кубогының гезектеги басқышында Өзбекстан сайланды командасы табыслы қатнасты.
1-ноябрь күнги жекпе-жек беллесиўлерде Қарақалпақ мәмлекетлик университети денетәрбия факультетиниң студентлери Гүлистан Пердебаева ҳәм Аякөз Жумамуратова өз шеберликлерин көрсетти. Дүньяның ең күшли 105 сабляшы қызлары қатнасқан кескин гүреслерде Қытай Халық Республикасынан келген жәҳән чемпионы, 19-жазғы Азия ойынлары жеңимпазы Симао Панго менен 15:14 есабында ойын көрсеткен Г.Пердебаева қола медалын қолға киргизди, А.Жумамуратова 1/8 финал басқышында қытайлы қарсыласы Чен Йинга менен беллесиўде бираз әўмет жетиспеди. Солай да болса, бул турнир Аякөздиң шеберлиги асып атырғанын көрсетти.
Келеси күни командалық беллесиўлер дүньяның күшли 15 мәмлекетинен дүзилген сайланды командалар арасында болып өтти. Япония, Қытай, АҚШ сайланды командаларын артта қалдырған Өзбекстан қылышпаз қызлары пъедсталдың екинши текшесине көтерилди. Гүлистан Пердебаева, Самира Шокирова, Фернанда Луиса Лара Ҳеррера ҳәм Аякөз Жумамуратовадан ибарат командамыз ярым финал басқышында Гонконг (Қытай) командасын 45:43 есабы менен жеңилиске ушыратып, финалға шекем жетип келди. Алтын медаль ушын болған қызғын беллесиўде жерлеслеримизге бираз әўмет жетиспеди ҳәм сайланды командамыз гүмис медалы менен шеклениўге мәжбүр болды. Жарыстың қола медалы Гонконг сайланды командасына, алтын медальды болса жарыс мезбанлары Қубла Корея сайланды командасына несип етти.
«Жарысқа еки күн қалғанда Наргиза Жақсыбаева аяғын қайырып алғаны себепли жарысларға қатнаса алмағаны өкинишли болды» деди сайланды командамыз тренери Дәўирбк Жийемуратов пенен телефон арқалы байланысқанымызда.
Биз өзлериниң спорт шеберликлерин аянбай көрсеткен жерлеслеримизди гезектеги мол табысын айрықша атап өтемиз. Жақында Ташкент қаласында болып өтетуғын жәҳән кубогинде буннан да жоқары нәтийжелерге ерисиўине тилек билдиремиз.
Пазылбек Генжебаев,
Халық аралық Өзбекстан спорт шебери, ҚМУ магистранты.
Қарақалпақстан хабар агентлиги