Нөкис қаласында Өзбекстан Республикасы Президентиниң 2022-жыл 23-декабрьдеги «Гимнастика спорт түрлерин буннан былай да раўажландырыў илажлары ҳаққында»ғы қарарының орынланыўын тәмийинлеў мақсетинде, көркем гимнастика бойынша оқыўшылар арасында «Мектепке шекемги ҳәм мектеп билимлендириўи министри кубоги» жарысының Қарақалпақстан Республикалық басқышы болып өтти.
Жарыста Нөкис қаласы ҳәм районлық басқышларында жеңимпаз болған оқыўшылар қатнасып, 1-4-класс оқыўшылары командалық ҳәм жеке шынығыўлар бойынша өз шеберликлерин көрсетти.
Қызықлы өткен жарыс жуўмағында, Нөкис қаласы оқыўшылары жарыс жеңимпазы болды.
Сыйлы екинши ҳәм үшинши орынлар болса, Тахтакөпир ҳәм Қоңырат районларының гимнастикашы қызларына несип етти.
Жарыс соңында, жеңимпазлар Қарақалпақстан Республикасы Мектепке шекемги ҳәм мектеп билимлендириў министрлиги тәрепинен дәрежели диплом менен сыйлықланып, жарыстың Өзбекстан Республика басқышына жолламаны қолға киргизди.
Адилбай Оразов,
Қарақалпақстан хабар агентлиги шолыўшысы