Өзбекстан Республикасы Президентиниң 2021-жыл 14-январ күнги “Шахматты буннан былай да раўажландырыў ҳәм ғалаба ен жайдырыў ҳәм шахматшыларды таярлаў тараўын жетилистириў илажлары ҳаққында”ғы қарарында белгиленген ўазийпаларды орынлаў мақсетинде, Қарақалпақстан Республикасы Шахмат федерациясының басламасы менен пайтахтымызда жайласқан Жаслар орайында Қарақалпақстан Республикасы Мектепке шекемги ҳәм мектеп билимлендириў министрлиги ҳәм Жаслар ислери агентлиги Қарақалпақстан Республикасы басқармасының шөлкемлестириўи менен спорттың шахмат түринен Республикалық жарыс шөлкемлестирилди.
Оған республикамыздың барлық аймақларынан 5-7-жас аралығында мектепке шекемги билимлендириў шөлкеми тәрбияланыўшылары қатнасты ҳәм жеңимпазлық ушын өз-ара беллести.
Қызықлы өткен жарыс жуўмағында, балалар арасында, биринши орынды Нөкис қаласынан Алпамыс Бахтияров, екинши орынды Әмиўдәрия районынан Жалаладин Алимбаев ҳәм сыйлы үшинши орынды Нөкис районынан Мансур Аманиязовлар ийелеўге миясар болды.
Ал, қызлар арасында болса, биринши орынды Нөкис районынан Шахзада Ережепова жеңип алыўға миясар болды.
Сыйлы екинши ҳәм үшинши орынлар болса, Нөкис қаласынан Салиха Улығбекова ҳәм Хожели районынан Имана Қурбанбаеваларға несип етти.
Жарыс соңында, жеңимпаз тәрбияланыўшыларға Қарақалпақстан Республикасы Мектепке шекемги ҳәм мектеп билимлендириўи министрилиги атынан диплом ҳәм естелик саўғалар тапсырылды.
Адилбай Оразов,
Қарақалпақстан хабар агентлиги шолыўшысы