Самарқанд мәмлекетлик ветеринария медицинасы, шарўашылық ҳәм биотехнологиялар университети Нөкис филиалында ӨзЛиДеП Қарақалпақстан Республикасы Кеңесиниң хызметкерлери, филиал басшылары ҳәм студент-жасларының қатнасыўында «Жаўызлыққа қарсы ағартыўшылық пенен гүресиў» атамасында ушырасыў болып өтти.
Ушырасыўда сөзге шыққанлар ҳәр қандай халық ҳәм миллеттиң аўызбиршиликли болыўында миллий идея үлкен орын тутатуғынлығы, раўажланыў жолында баратырған мәмлекетимизде де бул мәселе үлкен әҳмийетке ийе екенлиги, бузғыншы идеологияларға қарсы ағартыўшылық арқалы гүресиўди үгит-нәсиятлаў илажларын алып барыў да әҳмийетли мәселе екенлиги атап өтилди.
Партияның Қарақалпақстан Республикасы Кеңеси Жаслардың машқалаларын үйрениў ҳәм исбилерменликти қоллап-қуўатлаў бөлиминиң баслығы К.Худайбергенова жасларға быйылғы жылы болып өткен сайлаўдың жуўмақлары бойынша мағлыўмат берди.
Илаж даўамында студент-жасларға миллий байлықларымызды қәстерлеп сақлаў, идеологиялық иммунитеттиң қалай қәлиплесиўи, идеологиялық ҳүжимлер ҳәм оларға қарсы гүресте нелерге итибар бериў зәрүр екенлиги, бүгинги глобалласыў дәўиринде жат идея ҳәм идеологиялар тәсирине түсип қалмаў, оларға қарсы миллий идеяға сүйенген ҳалда гүресиў керек екенлиги бойынша түсиниклер берилди.
Ушырасыў даўамында студент-жаслардың пикир-усыныслары тыңланып, олар өзлерин қызықтырған сораўларға жуўап алды.
Ә.Жийемуратов,
Қарақалпақстан хабар агентлиги