Усы жыл 23-октябрь күни Қарақалпақстан Республикасы Орайлық сайлаў комиссиясында баспасөз конференциясы болып өтти.
Конференцияда Орайлық сайлаў комиссиясының Баспасөз орайы баслығы М.Қутлымуратов, комиссия хаткери А.Алланиязов ҳәм комиссия ағзасы М.Утепбергеновлар усы жылдың 27-октябрь күни болып өтетуғын Олий Мажлис Нызамшылық палатасы, Қарақалпақстан Республикасы Жоқарғы Кеңеси ҳәм жергиликли Кеңеслерге депутатларды сайлаўды өткериў ҳәм оған таярлық көриў бойынша әмелге асырылып атырған илажлар ҳаққында ғалаба хабар қуралллары ўәкиллерине мәлимлеме берди.
Баспасөз орайының баслығы өз мәлимлемесинде усы сиясий процесстиң ашық-айдын өтиўин тәмийинлеўде, оған таярлық процесслерин кеңнен сәўлелендирип барыўда ғалаба хабар қуралларының орны әҳмийетли екенлигин, бул бағдарда журналистлерге мәлимлемени оператив жеткериў мақсетинде Орайлық сайлаў комиссиясының Баспасөз орайы шөлкемлестирилгенлигин атап өтти.
Буннан соң шығып сөйлеген Орайлық сайлаў комиссиясының хаткери А.Алланиязов комиссия ағзаларының жумысы, сайлаў участкаларының сиясий процесске таярлығы ҳаққында айтып берди.
ҒХҚ ўәкиллерине быйылғы сайлаў процесиндеги өзгерислер ҳаққында Орайлық сайлаў комиссиясының ағзасы М.Утепбергенов түсиник берди. Ол өз сөзинде Өзбекстан тарийхында биринши мәрте Олий Мажлис Нызамшылық палатасы сайлаўлары аралас сайлаў системасы, яғный мажоритар ҳәм пропорционал система тийкарында өткерилетуғынлығын, сайлаўдың технологиялық жаңалығы сыпатында иске түсирилген “E-Saylov” мәлимлеме системасы енгизилгенлигин, бул система басқа электрон платформалар менен интеграцияланғанлығын, сайлаўдағы көплеген тәртип-қағыйдалар инсан факторысыз толық автоматластырылған тәризде әмелге асырылатуғынлығын атап өтти.
Баспасөз конференциясы жуўмағында Орайлық сайлаў комиссиясының Баспасөз орайы баслығы М.Қутлымуратов болажақ сайлаўға таярлық көриў ҳәм оны өткериў менен байланыслы процесслерди сәўлелендириўде комиссия жанындағы баспасөз орайы барлық ҒХҚ ўәкиллерин сиясий илажды биргеликте белсене сәўлелендирип барыў ушын таяр екенлигин атап өтти.
Илажда журналистлер сайлаў күни процесслерди сәўлелендириў менен байланыслы өзлерин қызықтырған сораўларға жуўап алып, басқа да жаңалық ҳәм өзгерислер туўралы толық мағлыўматқа ийе болды.
Қарақалпақстан Республикасы Орайлық сайлаў комиссиясының
Баспасөз орайы.
Қарақалпақстан хабар агентлиги