Қараөзек районында спорттың Регби-7 түринен 14 жасар жас өспиримлер арасында Қарақалпақстан кубоги ушын жарыс болып өтти.
Онда республикамыздың барлық қала ҳәм районларынан спортшылар қатнасып, жеңимпазлық ушын өз-ара беллести.
Қызықлы өткен жарыс жуўмағында, балалар арасында биринши орынды Республикалық спорттың ойын түрлеры ҳәм жеңил атлетика спорт түрлерине қәнигелестирилген спорт мектеби ийелеўге миясар болып, кубок жеңимпазына айланды.
Ал, екинши ҳәм үшинши орынлар болса, Қараөзек ҳәм Нөкис районы командаларына несип етти.
Қызлар арасында беллесиўлерде Олимпия ҳәм миллий спорт түрлери бойынша Нөкис жоқары спорт шеберлиги мектебине тең келетуғын қарсылас табылмады. Бул мектеп тәрбияланыўшылары Қарақалпақстан кубогин жеңип алыўға еристи.
Жарыстағы сыйлы орынларды болса, Әмиўдәря районы ҳәм Республикалық спорттың ойын түрлеры ҳәм жеңил атлетика спорт түрлерине қәнигелестирилген спорт мектеби командалары ийеледи.
Жарыс жуўмағында жеңимпазлар шөлкемлестириўшилер тәрепинен таярланған диплом, медал ҳәм кубок пенен сыйлықланды.
Адилбай Оразов,
Қарақалпақстан хабар агентлиги шолыўшысы