Бүгинги күнде Нөкис районының тәбийғый газ жетип барыӯы қыйын саналған алыс аӯыллық елатлы пунктлеринде жасаӯшы халыққа суйылтырылған газ баллонлар белгиленген график тийкарында иркинишсиз өз ӯақтында жеткерилип берилмекте.
Район бойынша жәми 1338 жеке хожалық суйылтырылған газге бейимлестирилген болып, олар тийкарынан Бақаншақлы, Қырантаӯ, Арбашы, Кердер, Тақыркөл ҳәм Ақтерек аӯыл пуқаралар жыйынлары аймақларында жайласқан.
Усы суйылтырылған газ тутыныӯшыларына “Ҳудудгаз Қарақалпақстан” газ тәмийнаты филиалы тәрепинен 2024-жылдың 1-октябрь ҳалатына 174,10 тонна суйылтырылған газ фонды ажыратылған болып, әмелде 175,28 тонна суйылтырылған газ жеткерип берилген. Суйылтырылған газ баллонлар арнаӯлы “ИСУЗУ” маркалы автотранспортлар жәрдеминде Нөкис газ толтырыӯ станциясынан тасылып алыс аӯыллардағы тутыныӯшыларға жеткерилип бериледи.
Суйылтырылған газ тутыныӯшыларына толығы менен ID карталар тарқатылған болып, есап-санақ китап жумыслары Е.газ программасы бойынша әмелге асырылмақта.
Қарақалпақстан хабар агентлиги