4-5-октябрь күнлери Төрткүл районында Өзбекстан, Қарақалапқстан, Түркменстан ҳәм Татарстан халық артисти, мәмлекетлик сыйлықлардыӊ лауреаты, миллий қосықшылық көркем өнериниӊ белгили ўәкили Атажан Худайшукуров туўылғаныныӊ 80 жыллығына бағышланған бир қатар илажлар өткерилди.
Атап айтқанда, район орайындағы мәденият сарайында «Ана дияр жыршысы» атамасындағы республикалық таңлаў, көркем өнер ҳәм мәденият хызметкерлериниң қатнасыўында «Устазды еслеп» концерт бағдарламасы, районы ҳәкимлигиниң мәжилислер залында әмелий конференция болып өтти.
Еки күн даўам еткен таңлаў жуўмағында, биринши орынды Хорезм ўәлаятынан Сирожиддин Омонов, екинши орынды Төрткүл районынан Еркин Мадрахимов ҳәм Самарқанд ўәлаятынан Мурад Нуриевлер, үшинши орынды төрткүлли Алишер Каримбоев ҳәм Наўайы ўәлаятынан Улуғбек Саидовлар ийелеўге миясар болды.
Сондай-ақ, таӊлаўда Тахир Атаджанов «Еӊ жақсы сувора атқарыўшысы», Сирожиддин Юлдашев «Еӊ жақсы даўыс ийеси», Бўрибек Баҳрамов «Еӊ жақсы атқарыўшы» ҳәм Ихтияр Аллаяров «Еӊ уқсас даўыс ийеси» номинациялары бойынша жеӊимпаз деп табылды.
Жеӊимпазлар шөлкемлестириўшилер тәрепинен диплом ҳәм баҳалы саўғалар менен сыйлықланды.
Усылар менен бир қатарда, салтанатлы илажда халқымыздың руўхый дүньясын байытыў, миллий дәстүрлеримизди, тарийхый ҳәм руўхый мийрасларымызды үгит-нәсиятлаў, жас әўладты Ўатанға садықлық, улыўма инсаныйлық қәдириятлар руўхында тәрбиялаўдағы хызметлери, сондай-ақ, Атажан Худайшукуров туўылғаныныӊ 80 жыллық юбилейин жоқары дәрежеде шөлкемлестиргени ушын Қарақалпақстан Республикасы Жоқарғы Кеңеси Президиумының қарары менен Өзбек миллий мақам көркем өнери орайы Қарақалпақстан Республикасы аймақлық бөлиминиң сазендеси Ғафур Худайшукуров ҳәм А.Худайшукуров атындағы 52-санлы Мәденият орайының дөгерек басшысы Юлдаш Абдураимовлар «Ардақлы нураный», Мәденият орайының баслығы Бахтияр Худайшукуров ҳәм усы орайдыӊ көркемлик жақтан басшысы Иззат Аллабергеновлар «Ўатан пидайысы» көкирек белгилери менен сыйлықланды.
Салтанатлы илаж көркем өнер шеберлери ҳәм жас атқарыўшылардыӊ концерт бағдарламасы менен жуўмақланды.
Илажға Қарақалпақстан Республикасы Жоқары Кеңесиниң комитет баслығы Т.Романов қатнасты.
Қарақалпақстан хабар агентлиги