Грек-рим гүреси бойынша Өзбекстан сайланды командасы тренерлер штабында өзгерислер жүз берди.
Атап айтқанда, сайланды командаға бас тренер етип, командамыздың бурынғы ағзасы Рустам Ассакалов тайынланды.
Буннан алдын сайланды командамыздың тренерлер штабында елимиздиң және бир белгили палўаны, Рио Олимпиадасының сыйлы орын ийеси Элмурат Тасмурадов та өз жумысын баслаған еди.
Мағлыўмат сыпатында айтатуғын болсақ, Рустам Ассакалов усы күнге шекем Өзбекстан сайланды командасы қурамында 2015-жылы Лас-Вегас ҳәм 2019-жылы Нур-Султан қалаларында өткерилген жәҳән чемпионатларында гүмис ҳәм қола медалын жеңип алған еди. Сондай-ақ, ол үш мәрте Азия ойынларында жеңимпаз ҳәм сыйлы орын ийеси, үш мәрте Азия чемпионы ҳәм төрт мәрте сыйлы орын ийеси болған.
Усылар менен бир қатарда 2017-жылы Баку, 2021-жылы Коня қалаларында өткерилген Ислам тилеклеслик ойынларында қола ҳәм алтын медальды жеңип алған ҳәм Париж Олимпиадасындағы жарыстан соң өзиниң профессионал ҳәрекетин тоқтатқан еди.
Адилбай Оразов,
Қарақалпақстан хабар агентлиги шолыўшысы