Футбол бойынша Европа Чемпионлар Лигасының 2-турынан орын алған ойынлар 2-октябрь, сәршемби күни болып өтти.
«Реал» сапарда «Лилл» мийманы болды. Биринши бөлимниң ақырында Девид тәрепинен пеналтиден урылған гол есабынан француз клубы киши есаптағы жеңиске еристи.
«Бавария» болса «Астон Вилла»ға жеңилди. Ойындағы жалғыз гол 79-минутта Дуран тәрепинен урылды.
«Ливерпуль» өзинде «Болоня»ны қабыллады. Ушырасыўдың 11-минутында Мак Аллистер есапты ашты. 75-минутта Салах әжайып гол менен есапты исенимли көриниске алып келди. Қалған минутларда дәрўазаларға гол урылмады ҳәм мерсисайдлилер 2:0 есабында жеңиске еристи.
«Ювентус» «Лейпциг»ти 3:2 есабында жеңди. Туринлилер қурамында Влахович дубльге ийе болған болса, Консейсау бир гол авторына айланды. Немис клубы қурамында Шешко еки гол урды.
Сондай-ақ, «Бенфика» «Атлетико»ны 4:0 есабында жеңди, «Динамо» Загреб «Моноко» менен 2:2 есабында теңбе-тең ойнады.
Қарақалпақстан хабар агентлиги