Хоккей бойынша Өзбекстан миллий сайланды командасы туңғыш мәрте жәҳән чемпионатында қатнасады.

Командамыз ағзалары 2025-жылдың 13-19-апрель күнлери Армения пайтахты Ереван қаласында өткерилетуғын жәҳән чемпионатының IV-дивизионында Армения, Иран, Кувейт, Малайзия ҳәм Индонезия сайланды командалары менен жеңимпазлық ушын беллесиўлерге түседи.

Бул туўралы Өзбекстан хоккей федерациясы мәлимледи.

Сондай-ақ, хоккей бойынша Өзбекстан жаслар сайланды командасы да 18 жасқа шекемги хоккейшилер арасында 2025-жылдың 28-февраль – 6-март күнлери Таиландтың Бангкок қаласында өткерилетуғын жәҳән чемпионатына қатнасады.

Чемпионатта жас хоккейшилеримиз өз топарында Таиланд, Түркменстан, Қубла Африка, Люксембург ҳәм Босния ҳәм Герцеговина жаслары менен өз-ара гүрес жүргизеди.

Мағлыўмат ушын айтатуғын болсақ, мәмлекетимиздиң усы жас бойынша хоккей сайланды командасы Азия ҳәм Океания кубогиниң әмелдеги жеңимпазы болып табылады.

Адилбай Оразов,

 Қарақалпақстан хабар агентлиги шолыўшысы