Усы жыл 28-сентябрь күни Нөкис қаласындағы орайлық амфитеатрда қол урысының R1 бағдары бойынша профессионал спортшылар арасында «Аралбойы кубоги» халықаралық турнири жарыслары болып өтти.
Турнирде Қарақалпақстан Республикасы Жоқарғы Кеңесиниң Баслығы Аманбай Орынбаев шығып сөйлеп, қатнасыўшыларға әўмет тиледи.
Буннан соң турнир беллесиўлерине старт берилди. Онда Россия, Иран, Беларусь, Қазақстан, Қырғызстан, Тәжикстан мәмлекетлеринен професционал спортшылар қатнасты.
73 килограмм салмақта Зафар Абдурахманов (Қазақстан) ҳәм Азизхон Абдуллаев, Иман Жокар (Иран) ҳәм Имомали Эргашев (Өзбекстан), Осимбек Муминбеков (Тәжикстан) ҳәм Далер Юлдашев (Өзбекстан) арасындағы беллесиўлерде мәмлекетимиз спортшылары жеңиске еристи. Ең аўыр 97 килограмм салмақ категориясы бойынша өзбекстанлы Азиз Қалжанов тәжикстанлы Олег Кимовты, қырғызстанлы Каримжан Балтабаев мәмлекетимиз ўәкили Жамшид Рахмоналиевти, республикамыздан Батырбек Хожабеков россиялы Абдулла Исаевты жеңип шығыўға еристи.
Халықаралық турнир жеңимпазларына шөлкемлестириўшилер тәрепинен ақшалай сыйлық ҳәм естелик саўғалары тапсырылды.
Қарақалпақстан хабар агентлиги