Өзбекстан Республикасы Сыртқы ислер министрлиги баспасөз хызметиниң мәлимлемесине бола, Нью-Йорк, 2024-жыл 25-сентябрь – БМШ Бас Ассамблеясы 79-сессиясының «жоқары дәрежедеги ҳәптелиги» шеңберинде шөлкем Уставының 102-статьясына муўапық БМШ Секретариятында Өзбекстан Республикасы ҳәм Қазақстан Республикасы арасында Өзбекстан-Қазақстан мәмлекетлик шегарасын демаркациялаў ҳаққындағы шәртнаманы дизимнен өткериў ҳәм жәриялаў ушын зәрүр ҳүжжетлер тапсырылды.

Келисимге Өзбекстан Республикасы Президенти Шавкат Мирзиёев ҳәм Қазақстан Республикасы Президенти Қасым-Жомарт Тоқаев тәрепинен 2022-жыл 22-декабрь күни Қазақстан басшысының Өзбекстанға мәмлекетлик сапары даўамында қол қойылған ҳәм 2023-жыл 4-июль күни күшке кирген. Бул ҳүжжет Өзбекстан-Қазақстан мәмлекетлик шегарасын халықаралық ҳуқықый жақтан рәсмийлестириў бойынша көп жыллық биргеликтеги жумыслардың нәтийжеси болып табылады.

Быйылғы жылдың 25-сентябрь күни Нью-Йорктағы БМШ Бас Ассамблеясы сессиясы шеңберинде Өзбекстан ҳәм Қазақстан сыртқы ислер министрликлери басшылары Мәмлекетлик шегараны демаркациялаў ҳаққындағы шәртнаманың БМШ Секретариятында дизимнен өткерилгени Орайлық Азия мәмлекетлери ушын мисли көрилмеген тәжирийбе екени атап өтти.

Ҳүжжеттиң тарийхый әҳмийети атап өтилип, бул ўақыя еки мәмлекеттиң жақсы қоңсышылық ҳәм мәңги дослық принциплерине садықлығы, аўқамласлық қатнасықларының руўхын, улыўма абаданлық пайдасы ушын өз-ара пайдалы бирге ислесиўге таяр екенин және бир мәрте тастыйықлайтуғыны атап өтилди, сондай-ақ, бул ҳүжжет Орайлық Азияда қәўиепсизлик ҳәм турақлылықты және де беккемлеўге хызмет ететуғынына итибар берилди.

Қарақалпақстан хабар агентлиги