Усы жылдың 19-сентябрь күни Әжинияз атындағы Нөкис мәмлекетлик педагогикалық институтында «Декос» компаниясы ҳәм «МФактор» жойбарының тийкарын салыўшысы сыпатында халқымызға белгили болған исбилермен Ҳасан Мамасаидов пенен ушырасыў болып өтти.
-Илажға институт ректораты, жаслар аўқамы басланғыш шөлкеминиң жетекшилери ҳәм студент-жаслар қатнасты,-деп хабар береди НМПИ Баспасөз хаткери Ислам Матеков.
Ушырасыўда институт ректоры ўазыйпасын ўақытша атқарыўшысы Қувондиқ Қодиров сөзге шығып, исбилермен Ҳасан Мамасаидов тәрепинен әмелге асырылып атырған жойбарлар, олардың әҳмийети, сондай-ақ, оның «Бизнес марафон» жойбарында турақлы түрде спикерлик етип, жаслар исбилерменлигин раўажландырыў бағдарында ислеп атырған жумыслары ҳаққында мағлыўматлар берди. Мийманға ҳүрмет көрсетилип, қарақалпақ халқының миллий шапанын саўға етти.
Ушырасыў барысында исбилермен өзиниң өмири ҳәм мийнет жолы, исбилерменликке қойған дәслепки қәдеми, жумыс процесинде жол қойған кемшиликлери, ушыраған қыйыншылықлары, оларды қалай жеңип өтип, бүгингидей дәрежеге ерискени бойынша өмирлик тәжирийбеси менен таныстырды.
Ушырасыўда студент-жаслар исбилерменлик басламалары ҳәм жойбарлары ҳаққында Ҳасан Мамасаидовқа бир қатар сораўлар берип, оларға тийисли жуўаплар алды.
Илажда ең жақсы сораў ийелерине Ҳасан Мамасаидов тәрепинен өз авторлығындағы «Бу китоб сиз учун эмас, балки бўлажак лидерлар учун…» атамасындағы китабы саўға етилди.
Адилбай Оразов,
Қарақалпақстан хабар агентлиги шолыўшысы