Кеше футзал бойынша елимизде өткерилип атырған жәҳән чемпионатында «А» ҳәм «В» топарларында 2-тур ойынлары болып өтти.
Тур шеңберинде өткерилген ойынларды Коста-Рика ҳәм Нидерландия, Таиланд ҳәм Куба ойынлары баслап берди. Онда Таиланд сайланды командасы Кубаны 10:5 есабында жеңип шыққан болса, Коста-Рика ҳәм Нидерландия футзалшылары арасындағы ушырасыў 2:2 есабы менен жуўмақланды.
Ал, «Ҳумо Арена»да өткерилген Өзбекстан ҳәм Парагвай сайланды командалары арасындағы ойында болса, мәмлекетимиз футзалшылары мийманларға 1:4 есабында жеңилип қалды.
Усы ойын менен параллель өткерилген Бразилия ҳәм Хорватия сайланды командалары арасындағы ушырасыў 8:1 есабында бразилиялардың пайдасына шешилди.
Солай етип, бул еки топарда өткерилген 2-турдан соң Парагвай, Бразилия ҳәм Таиланд сайланды командалары жәҳән чемпионатының келеси басқышына жол алған болса, Коста-Рика, Нидерландия ҳәм Өзбекстан сайланды командаларының кейинги тәғдири 3-турдан соң мәлим болады.
Адилбай Оразов,
Қарақалпақстан хабар агентлиги шолыўшысы