Усы жылдың 22-24-август күнлери Башқуртстан Республикасында II халықаралық “Гүз романтикасы” классикалық музыка фестивалы болып өтти.
Фестиваль шеңберинде көркем өнер шеберлеримиз Башқуртстан Республикасы мәмлекетлик академиялық симфониялық оркестри менен биргеликте башқурт халқына миллий мәдениятымыз үлгилери жәмленген концерт бағдарламасын усынды. Илаж соңында делегациямыз ағзалары Башқуртстан Республикасының мәмлекетлик атақлары менен сыйлықланды.
Атап айтқанда, Қарақалпақстан Республикасына хызмет көрсеткен артист Бегис Темирбаев “Башқуртстан Республикасы халық артисти”, Әлишер Наўайы атындағы Үлкен академиялық театры солисти Өтемис Жуманиязов, жас талант ийелери Маманбий Жумабаев ҳәм Хурсандбек Атамуратовлар “Башқурстан Республикасына хызмет көрсеткен артист” ҳүрметли атақлары менен сыйлықланды. Өзбекстан, Қарақалпақстан, Башқуртстан ҳәм Татарстан халық артисти Жеңисбек Пиязовға Башқурстан Республикасы ҳүкиметиниң “Ҳүрмет жарлығы” тапсырылды.
Бул хош хабар әзелден туўысқан қарақалпақ ҳәм башқурт халықларының беккем дослығының айқын көриниси, ҳәр тәреплеме бирге ислесиў, социаллық-экономикалық, саўда-сатық, мәдений байланысларды күшейтиў бағдарында әмелге асырылып атырған кең көлемли жумыслардың нәтийжеси болып есапланады.
Қарақалпақстан хабар агентлиги