Қарақалпақстанда атмосфера суў генараторы жәрдеминде, ҳаўадан суткасына 150 литр таза ишимлик суўы ислеп шығарылады.
Адамзат тиришилиги ушын суўдың қәдири бийбаҳа болып есапланады. Әллеқашан, пүткил дүньяның басым көпшилиги климаттың өзгериўи ҳәм суў тамтарыслығы деген глобал машқаланың қоршаўында қалды. Адамзат суў жетиспеўшилигинен жәбир шекпекте. Арал теңизиниң қурып кетиўи нәтийжесинде суў тамтарыслығы машқаласы Аралбойы халықларының да баслы тәшўишине айланып бармақта. Дүнья илимпазлары, енди суўсызлық машқаласына да шешим таўып, адамзатты суўсызлық қәўипинен қутқарыўшы жаңа технологияны ойлап тапты. Бул технология атмосфера суў генераторы деп аталып, ҳаўадан суў ислеп шығарыўшы заманагөй жаңа қурылма болып есапланады.
Қарақалпақстан Республикасы Жоқарғы Кеӊесиниӊ басламасы менен Аралды қутқарыў Халықаралық қоры атқарыў комитети Нөкис филиалы тәрепинен Дания мәмлекетиниң “Ashkian Bino Group” жуўапкершилиги шекленген жәмийети менен дүзилген шәртнама тийкарында атмосфера суў генераторы Қарақалпақстанға алып келинди. Аралбойы халқының таза ишимлик суўға болған талабын қанатландырыў мақсетинде, ҳаўадан суткасына 150 литр ишимлик суўын ислеп шығарыўшы Megdoоt premium атмосфералық суў генераторы жәрдеминде таза ишимлик суў алыў технологиясын сынаўдан өткериў жумыслары басланды.
Ҳаўадан суў алыў жойбарын әмелде сынап көриў ушын Аралды қутқарыў Халықаралық қоры атқарыў комитети Нөкис филиалының есабынан 169 миллион 600 мың сум қаржы ажыратылды. Қурылма сыртқы атмосфера шараятларына бейимлесип, сутка ўақты, географиялық жайласыўына қарай суў ислеп шығарыўды оптималластырады. Көп тосықлы фильтрлер нәтийжесинде ҳаўаның сапасына қарамастан суўдың сапасы тәмийинленеди.
Биз нәпес алатуғын ҳаўада ығаллылық болады. Усы ығаллылық жәрдеминде атмосфера суў генераторлары керекли муғдарда суў ислеп шығарыўы мүмкин. Илимпазлар атмосфера суў генераторлары инсанлардың таза суўға болған талабын қанатландырып қоймастан, оның глобал климатлық өзгерислер қәўипсизлигин де тәмийинлей алатуғын технология екенлигин дәлийллей алған. Ҳаўадан суў алыўшы жаңа технологияның сынақ жумысларының жуўмағы бойынша қосымша мағлыўматлар бериледи.
Аралды қутқарыў Халықаралық қоры атқарыў комитети
Нөкис филиалы Мәлимлеме хызмети.
Қарақалпақстан хабар агентлиги