Ҳүрметли дослар!
Бәринен бурын, өз өмирин дүньядағы ең абырайлы кәсиплерден бири болған қурылыс тараўына бағышлаған сиз, әзизлерди қутлы кәсип байрамыңыз бенен шын жүректен қызғын қутлықлап, бәршеңизге өзимниң терең ҳүрметим ҳәм жақсы тилеклеримди билдиремен.
Әлбетте, бүгин биз көп миллетли халқымыз бенен бирге қурып атырған Жаңа Өзбекстанда жүз берип атырған ең әҳмийетли өзгерислер ҳаққында сөз етилгенде, барлық регион ҳәм аймақларымызды қамтып алған кең көлемли қурылыс ҳәм абаданластырыў жумыслары ҳаққында айрықша пикир жүритиўимиз тәбийғый болып табылады.
Ҳақыйқатында да, соңғы жыллары елимиз үлкен қурылыс ҳәм раўажланыў мәмлекетине айланды. Халқымыздың көз алдында қәд көтерип атырған заманагөй турақ жайлар, өндирис ҳәм хызмет көрсетиў комплекслери, инженерлик-коммуникация, жол ҳәм транспорт тармақлары, тәлим-тәрбия, денсаўлықты сақлаў, мәденият ҳәм спорт мәкемелери, бағ ҳәм қыябанлар, абад қала ҳәм аўылларымыздың көринисинде сизлердиң сийрек ушырасатуғын күш-ғайратыңыз, жоқары потенциал ҳәм қәбилетиңиз жәмленгенин тән алған ҳалда, бәршеңизди жаңа өмир қурыўшылары деп қәдирлеп, пидәкерлик мийнетиңиз ушын шын жүректен миннетдаршылық билдиремиз.
Қәдирли қурылысшылар!
Бизге белгили, ҳәзирги күнде қурылыс тараўы мәмлекетмиз экономикасының таяныш тармақларынан бирине айланбақта. Быйылғы жылдың биринши ярымында қурылыс жумысларының көлеми 2023-жылға салыстырғанда 10 проценттен көтерилип, дерлик 80 триллион сумға жеткени, тараўдың жалпы ишки өнимимиздеги үлеси 6 проценттен көбиректи қурап атырғаны бун айқын тастыйықлайды.
Ең тийкарғысы, барлық тараўлар қатарында қурылыс тармағындағы үлкен жумысларымыз да инсан қәдирин улығлаў, оның турмыслық мәплерин тәмийинлеўге қаратылмақта. Өткен жылы тек ғана инвестиция бағдарламасы шеңберинде 2 мың 526 социаллық ҳәи инфраструктура объектлеринде қурылыс ҳәм реконструкция жумыслары орынланғаны, «Басламалы бюджет» системасы тийкарында мәҳәллелеримиздеги 4 мыңнан аслам объектте 4,5 триллион сумлық қурылыс ҳәм абаданластырыў жумыслары әмелге асырылғаны да усыннан дәрек береди.
Әсиресе, кейинги жыллары халқымыз ушын заманагөй турақ жайларды қурыў бойынша мисли көрилмеген нәтийжелер қолға киргизилип атырғанын атап өтиў керек. Соңғы жети ярым жылда жәми 412 мың квартирадан ибарат яки 26 миллион квадрат метрлик дерлик 10 мың турақ жайдың қурылғаны мысалында буған толық исениў мүмкин.
Бул жумысларымыздың даўамы сыпатында быйылғы жылы 52 аймақта «Жаңа Өзбекстан» массивлери қурылмақта. «Жаңа Ташкент» ҳәм Олимпиада қалашалары сыяқлы мега объектлеримизде де қурылыс жумыслары жоқары пәтдер менен алып барылмақта. Тараўда «жасыл» стандартлар, энергияны үнемлейтуғын жаңа технологиялар, «ақыллы қала», «ақыллы үй» принциплери жедел қолланылмақта.
Қурылыс тараўында биринши мәрте жоқары маман кадрлар, беккем материаллар, машина ҳәм механизмлер базасы ҳәм нормаларын өзинде сәўлелендиретуғын ресурслар миллий классификаторы қәлиплести, қәнигелерди сертификатлаў системасы енгизилип, Компетенцияны раўажландырыў институты шөлкемлестириледи.
Ҳүрметли байрам қатнасыўшылары!
Қурылыс тараўын бүгинги тез пәт раўажланып баратырған заман талапларына сәйкес ҳалда раўажландырыў, қала қурылысы ҳүжжетлерин ислеп шығыўда жәмийетшиликтиң пикирин үйрениў ҳәм олардың орынланыўы бойынша жәмийетлик қадағалаўды орнатыў бүгинги күнде оғада үлкен әҳмийетке ийе.
Сондай-ақ, жойбар шөлкемлериниң жумысын жетилистириў, қурылыс материаллары базарын тәртипке салыў, санластырыў жумысларын тереңлестириў, имарат ҳәм объектлерде қолайлы ҳәм экологиялық қәўипсиз жасаў шараятларын жаратыў, энергия нәтийжелилигин арттырыў, қурылыс жумыслары процесинде қәўипсизлик ҳәм тәсиршең қадағалаўды тәмийинлеў бойынша алдымызда үлкен ўазыйпалар турғанын сиз – тараўда үлкен билим ҳәм тәжирийбеге ийе болған жумысшы ҳәм қурылысшы, архитектор ҳәм инженерлер, илимпаз ҳәм қәнигелер жақсы билесиз.
Исенимим кәмил, сизлер мине, усындай қыйын ҳәм жуўапкершиликли ўазыйпаларды табыслы орынлаўда және де белсендилик көрсетип, қурылыс тараўының раўажланыўын жаңа басқышқа алып шығасыз.
Әлбетте, тараў ўәкиллериниң машақатлы мийнетин хошаметлеў, жумыс ҳәм жасаў шараятларын жақсылаў мәселелерине биз буннан кеийн де үлкен әҳмийет қаратамыз.
Сиз, әзизлерди кәсип байрамыңыз бенен және бир мәрте қутлықлап, бәршеңизге беккем денсаўлық, таўсылмайтуғын күш-ғайрат, шаңарақларыңызға тынышлық-татыўлық ҳәм қут-берекет тилеймен.
Жанажан Ўатанымызды ҳәр тәреплеме гөззал ҳәм абат етиўде сизлерге жаңа табыс ҳәм әўметлер яр болсын!
Шавкат МИРЗИЁЕВ,
Өзбекстан Республикасы Президенти