Өзбекстан Республикасы Министрлер Кабинети «Өзбекстан Республикасында  қәнигелестирилген психиатриялық ҳәм наркологиялық хызмет көрсетиўдиң бирден-бир шөлкемлестириў-методикалық вертикал басқарыў системасын енгизиў ҳаққында»ғы  қарарды қабыл етти.

Оған муўапық, руўхый кеселликлердиң алдын алыў, оларды ерте анықлаў, оларға диагноз қойыў ҳәм емлеўди және де жетилистириў, республикалық психиатрия мәкемелериниң материаллық-техникалық базасын ҳәм кадрлар потенциалын беккемлеў, жумыс нәтийжелилигин арттырыў және де тараўда нәтийжели басқарыў системасын енгизиў мақсетинде Өзбекстан Республикасы Денсаўлықты сақлаў министрлигиниң:

Қарақалпақстан Республикасы, ўәлаятлар ҳәм Ташкент қаласы психиатриялық ҳәм наркологиялық хызметиниң медициналық мәкемелери Республикалық қәнигелестирилген руўхый саламатлық илимий-әмелий медициналық орайының аймақлық филлиаллары сыпатында;

Қашқадәрья ўәлаятының 1-санлы руўхый нерв кеселликлери диспансери оған Қашқадәрья ўәлаятының руўхый кеселликлер емлеўханасын қосып жибериў арқалы Республикалық қәнигелестрилген руўхый саламатлық илимий-әмелий медициналық орайының психиатриялық хызмети бойынша Қашқадәрья ўәлаятының филиалы сыпатында  қайта шөлкемлестириледи.

Республикалық қәнигелестирилген руўхый саламатлық илимий-әмелий медициналық орайының психиатрия хызмети бойынша Қашқадәрья ўәлаяты 1-санлы рухый нерв кеселликлери диспансери ҳәм Қашқадәрья ўәлаятының руўхый кеселликлер емлеўханасының ҳуқықлары және миннетлери бойынша аймақлық мийрасқоры болып есапланады.

Усы қарар  менен:

Республикалық қәнигелестирилген руўхый саламатлық илимий-әмелий медицина орайы системасындағы психиатрия ҳәм норкология хызметлириниң шөлкемлестириў структурасы;

Республикалық қәнигелестирилген руўхый саламатлық илимий-әмелий медициналық орайының психиатриялық хызмети бойынша Қарақалпақстан Республикасы, ўәлаятлар ҳәм Ташкент қаласы филлиалларын шөлкемлестириў дизими;

Республикалық қәнигелестирилген руўхый саламатлық илимий-әмелий медициналық орайының наркологиялық хызмети бойынша Қарақалпақстан Республикасы, ўәлаятлар ҳәм Ташкент қаласы филлиалларын шөлкемлестириў дизими тастыйқланды.

Республикалық қәнигелестирилген руўхый саламатлық илимий-әмелий медициналық орайы ҳәм оның аймақлық филлиалларының тийкарғы ўазыйпалары:

халыққа  жоқары маман қәнигелестирилген  медициналық жәрдем көрсетиў;

басланғыш буўын медициналық мәкемелерине руўхый саламатлықты қорғаў хызметлерин интеграциялаў арқалы руўхый жағдайының бузылыўын ерте анықлаў ҳәм  емлеў илажларын көриў;

басланғыш буўын медициналық мәкемелери шыпакерлериниң руўхый жағдайы бузылған шахсларды клиникалық баҳалаў, емлеў ҳәм бақлап барыў бойынша көнликпелерин раўажландырыў ҳәм билимлерин арттырыў;

руўхый жағдайы бузылған шахсларды дәри-дәрмақлар менен мүтәжлигине бола толық тәмийинлеў илажларын көриў;

халық, әсиресе, балалар ҳәм жас-өспирим жаслардың руўхый саламатлығын беккемлеў;

медицина хызметкерлерин кәсиплик дәрежесин, соның ишинде қәнигелердиң сырт ел жетекши медициналық билимлендириў мәкемелеринде ҳәм клиникаларында өз қәнигелиги бойынша кесселиклерге диагноз қойыў ҳәм оларды емлеўдиң заманагөй усыллары бойынша стажировкаларын шөлкемлестириў арқалы турақлы түрде арттырып барыў ҳәм жетилистириў;

қәнигелиги бойынша кеселликлердиң алдын алыў, оларға диагноз қойыў ҳәм емлеў бойынша алдынғы усыллар ҳәм технологияларды ислеп шығыўға және де медицина әмелиятына енгизиўге қаратылған илимий изертлеўлер алып барыў;

сырт елли жетекши медицина мәкемелери менен халықаралық бирге ислесиўди кеңейтиў ҳәм беккемлеў;

район (қала)лық медицина  шөлкемлерине шөлкемлестириў-методикалық жақтан басшылық етиў,  олардың әмелиятына медициналық жәрдемниң заманагөй усылларын ҳәм технологияларын енгизиў, оператив мәсләҳәтлар (консультациялар) бериў, шеберлик сабақларын турақлы түрде өткерип барыўдан ибарат болады.

ӨзА