Орайлық банк активлер муғдары бойынша топарластырылған коммерциялық банклер жумысының айрықша көрсеткишлерин жәриялады.
Атап өтилиўинше, 2024-жылдың 1-июль жағдайына Өзбекстандағы 35 комерциялық банктиң жәми активлери 690,4 триллион сумды қураған. Жыл басында бул көрсеткиш 652,1 триллион сум, өткен 2023-жыл июльда 576,6 триллион сум болған.
Усы айдың алдында 12 банк активлери 3 триллион сумға шекем, 7 банктики 3 триллион сумнан 10 триллион сумға шекем, 9 банкте 10 триллион сумнан 30 триллион сумға шекем болған. Ең үлкен 7 банк активлери (ҳәр бириниң активи 30 триллион сумнан жоқары) 470,6 триллион сумды қураған.
Есабат дәўиринде республикадағы 35 банк тәрепинен ажыратылған жәми кредитлер муғдары 493,9 триллион сум болған. Январьда бул сан 471,4 триллион сум еди.
Июль айы алдында барлық банклер тәрепинен физикалық тәреплерге ажыратылған кредитлер 161,1 триллион сумды қураған. Соннан 101,3 триллион сумы ең үлкен 7 банк үлесине туўра келген.
Юридикалық тәреплерге ажыратылған кредитлер муғдары болса 332,9 триллион сумға жеткен. Бунда да жоқары көрсеткишти ең үлкен 7 банк (249,4 триллион сум) белгилеген.
Улыўма алғанда, банклер ажыратқан кредитлердиң тийкарғы бөлеги — 428,4 триллион сумы узақ мүддетке бағдарланған. Соннан миллий валютадағы кредитлер 277,2 триллион сум, сырт ел валютасындағы кредитлер 216,7 триллион сум.
Июль айы басында республикадағы барлық коммерциялық банклердиң улыўма капиталы 104,1 триллион сумды қураған. Салыстырыў ушын, бул көрсеткиш январь айында 97 триллион сум, 2023-жылдың 1-июлында 86 триллион сум болған.
Қарақалпақстан хабар агентлиги