Әжинияз атындағы Нөкис мәмлекетлик педагогикалық институтында 2023-2024-оқыў жылы питкериўшилерине диплом тапсырыўға бағышланған «Ҳақ жол Сизге, питкериўши!» атамасындағы салтанатлы кеше болып өтти.
Кешеге бакалавр тәлим бағдарлары ҳәм магистратура қәнигеликлери питкериўшилери, олардың ата-аналары, профессор-оқытыўшылар, педагог хызметкерлер, сондай-ақ, кең жәмийетшилик ҳәм ғалаба хабар қуралларының ўәкиллери қатнасты.
Илажда Қарақалпақстан Республикасы Министрлер Кеңеси Баслығының орынбасары Б.Отемуратов, институт ректоры ўазыйпасын ўақытша атқарыўшысы Қ.Қодиров шығып сөйлеп, барлық питкериўши жасларды қызғын қутлықлап, алдағы жумысларына табыслар тиледи.
Жуўмақланып атырған быйылғы оқыў жылында Нөкис мәмлекетлик педагогикалық институтын улыўма 3 мың 854 питкериўши, соннан бакалавриаттың күндизги тәлим бағдарлары бойынша 2 мың 576, сыртқы тәлим бағдарлары бойынша 1 мың 259 студент, ал магистратура қәнигеликлери бойынша 19 магистрант питкерип шықпақта.
Питкериўшилер арасынан мыңлаған студент-жаслар тийисли жумыс бериўшилер менен үш тәреплеме шәртнамалар дүзиў арқалы жумыс орынларына жолламалар алды.
Илажда бакалавриатура тәлим бағдарлары ҳәм магистратура қәнигеликлери питкериўшилерине дипломлар тапсырылды.
– Жуўмақланып атырған оқыў жылы институт тарийхында үлкен табысларға, жоқары нәтийжелерге толы жыллардың бири сыпатында тарийх бетлеринен орын алғанлығын атап өтиў орынлы,-дейди институттың баспасөз хаткери И.Мәтеков.
Институттың 15 студенти Өзбекстан көлеминде өткерилген мәмлекетлик стипендиялар таңлаўында, атап айтқанда, Өзбекстан Республикасы Президенти мәмлекетлик стипендиясы, Ислам Каримов, Наўайы, Ибрайым Юсупов, Төлепберген Қайыпбергенов, Заҳириддин Муҳаммед Бабур, Паҳлавон Маҳмуд атындағы мәмлекетлик стипендиялары таңлаўларында жеңимпаз болып, стипендиант атанды. Соның менен бирге, институттың бир топар белсенди студентлери Әжинияз Қосыбай улы атындағы стипендия таңлаўында жеңимпаз болды.
Институт студент-жаслары «Универсиада», «Студентлер лигасы», «Бес баслама олимпиадасы» сыяқлы спорт жарысларының республикалық финал басқышларында жоқары нәтийжелерди қолға киргизип, Қарақалпақстан Республикасы сайланды командасының Өзбекстан көлеминде сыйлы орынларды ийелеўине мүнәсип үлеслерин қосты.
Мәмлекетимизде қәбилетли жасларды илимий-техникалық жумысларға кеңнен тартыў, қәбилетли жаслардың билим, көнликпе ҳәм тәжирийбесин арттырыў мақсетинде шөлкемлестирилген «Мырза Улығбек әўладлары» таңлаўының республикалық финал басқышында институтымыздың Тәбийғый пәнлер факультети 4-курс студенти Жалалатдин Уснатдинов жеңимпаз деп табылып, базалық есаплаў муғдарының 20 есеси муғдарында ақшалай сыйлық пенен хошаметленди.
Илажда оқыў жылы даўамында усындай илим, билимлендириў, мәденият, спорт ҳәм басқа да бағдарларда үлкен нәтийжелерге ерискен, соның менен бирге, ҳәр қыйлы республикалық ҳәм халықаралық таңлаўлар, пән олимпиадалары, институт көлеминде өткерилген таңлаўлардың жеңимпазларына ҳәм олардың ата-аналарына саўғалар, миннетдаршылық хатлары және ҳүрмет жарлықлары тапсырылды.
Питкериў кешеси шеңберинде институттың талантлы студентлериниң атқарыўындағы концерт бағдарламасы қойып берилип, кеше қатнасыўшыларының кеўиллерине жоқары көтериңкилик бағышлады.
Қарақалпақстан хабар агентлиги.