Спорттың киши футбол түри бойынша “Қарақалпақстан Республикасы бажыхана басқармасы баслығы Кубоги” жарысы өткерилди.
Нөкис қаласындағы 31-санлы улыўма билим бериў мектеби Қарақалпақстан Республикасы бажыхана басқармасына бириктирилген.
Усы мектеп оқыўшылары арасында бажыхана жумысы бағдарында тәлим-тәрбия жумысларын шөлкемлестириў, жаслардың бажыхана тараўына қызығыўшылығын арттырыў, оларды әскерий-ўатансүйиўшилик руўхында тәрбиялаў, саламат турмыс тәризин қәлиплестириў мақсетинде бир қатар илажлар әмелге асырылмақта.
Усы мектептиң 7-11-класс оқыўшылары арасында спорттың киши футбол түри бойынша “Қарақалпақстан Республикасы бажыхана басқармасы баслығы Кубоги” жарысы болып өтти.
Жарыста командалар мүнәсип қатнасып, жарыс қызғын беллесиўлерге бай болды. Жарыстың барысы тәжирийбели төрешилер тәрепинен бақлап барылды.
– 31-санлы улыўма билим бериў мектеби Қарақалпақстан Республикасы Бажыхана басқармасы тәрепинен 2022-жылы аталыққа алынғанлы берли жаслардың тәлим-тәрбиясы бағдарында бир қатар илажлар әмелге асырылмақта,-дейди мектеп директоры В.Каленова.
Мектебимизде жас бажыханашылар дөгереги ислеп турыпты. Белгили, тәжирийбели, сондай-ақ, жас бажыханашылар мектебимизге келип, арнаўлы сабақлар өтип турады. Бажыхана менен биргеликте жаслардың кәмил инсан болып жетилисиўи ушын көплеген унамлы жумыслар исленбекте. Усы дәўирде шегара бажыхана постларына, республикамыздың дыққатқа ылайық орынларына мектебимиз оқыўшыларының бир неше саяхатлары шөлкемлестирилди ҳәм бул оқыўшыларымызда үлкен тәсир қалдырмақта. Әлбетте, бундай илажлар оқыўшыларымыздың, әсиресе, мектеп питкериўшилериниң бажыхана тараўына қызығыўшылығын арттырмақта.
Жарыс жуўмағында жеңимпазлар анықланып, ең жақсы ойыншылар менен командалар хошаметленип, олар I, II, III дәрежели диплом ҳәм баҳалы саўғалар менен сыйлықланды.
Ә.Жийемуратов,
Қарақалпақстан хабар агентлиги