Самарқанд мәмлекетлик ветеринария медицинасы, шарўашылық ҳәм биотехнологиялар университети Нөкис филиалында профессор-оқытыўшылар ҳәм хызметкерлер арасында спорттың стол тенниси бойынша “Директор кубоги” жарысы болып өтти.
Кафедра оқытыўшылары ҳәм хызметкерлериниң физикалық белсендилигин арттырыў, олардың бос ўақытларын мазмунлы өткериў ҳәм спортқа болған қызығыўшылығын арттырыў мақсетинде шөлкемлестирилген жарыс кескин тәризде өтти. Онда 4 кафедраның оқытыўшылары ҳәм хызметкерлери директор кубогин қолға киргизиў ушын өзлериниң шеберликлерин көрсетти.
Жарыс жуўмағында ерлер арасында биринши орынды “Ветеринария медицинасы ҳәм азық-аўқат қәўипсизлиги” кафедрасының ассистент-оқытыўшысы С.Камилжонов, екинши орынды хызметкерлерден З.Алеўов, үшинши орынды “Экономика ҳәм гуманитар пәнлер” кафедрасының ассистент-оқытыўшысы Е.Сейтмуратов ийеледи. Ҳаял-қызлар арасында “Ҳайўанатлар анатомиясы, физиологиясы ва биохимиясы” кафедрасының ассистент-оқытыўшысы Б.Муратбаева биринши, усы кафедраның және бир ассистент-оқытыўшысы З.Оспанова екинши орынларды ийелеген болса, хызметкерлерден К.Қожамбергеноваға үшинши орын несип етти.
Сыйлы орын ийелерине кәсиплик аўқам комитети тәрепинен сыйлықланды. Жарыстың обсолют жеңимпазларына “Директор кубоги” тапсырылды.
Қарақалпақстан хабар агентлиги